Etnojýrnalıstıka salasynda «Shańyraq» baıqaýy jarııalandy

ASTANA. 20 tamyz. QazAqparat - Mádenıet jáne aqparat mınıstrligi Qazaqstan halyqtary Assambleıasynyń qoldaýymen uıymdastyrylatyn etnojýrnalıstıka salasyndaǵy «Shańyraq» atty konkýrsqa qatysý úshin materıaldardy qabyldaýdyń bastalǵanyn jarııalaıdy.

Baıqaýdyń maqsattary jáne mindetteri:
- qoǵamdaǵy etnosaralyq kelisimdi jáne Qazaqstan halqynyń birligin nyǵaıtý;
- etnosaralyq qatynastar men mádenıetaralyq úndestik salasyndaǵy memlekettik saıasattyń jetistikterin jarııa etý;
- Qazaqstanda ómir súretin qazaq halqy men etnostardyń mádenıetin, salt-dástúrlerin nasıhattaý;
- memlekettik tildiń qoldanylý aıasyn keńeıtý;
- qazaqstandyq etnojýrnalıstıkany damytýǵa yqpal etý;
- etnosaralyq kelisim taqyrybyn jarııalaýdaǵy qazaqstandyq buqaralyq aqparat quraldarynyń róli men jaýapkershiligin arttyrý.

Konkýrsqa qatysý úshin 2013 jyly BAQ baspalarynda jáne Internet-resýrstardaǵy, oǵan qosa tele-radıo habarlary men baǵdarlamalarynda memlekettik jáne orys tilinde jarııalanǵan maqalalar qabyldanady.

Usynylatyn materıaldardyń mazmuny rýhanı kelisim ıdeıalaryn qalyptastyrý men taratýǵa, qazaqstandyq patrıotızmge baǵyttalýy qajet. Sonymen qatar, usynylatyn materıaldar Qazaqstan Respýblıkasyndaǵy ultaralyq qarym-qatynastyń ártúrli qyrlaryn qamtyp, ulttyq-mádenı birlestikterdiń, Qazaqstan halyqtary Assambleıasy men kishi assambleıalardyń qyzmetin baıandap, Qazaqstan halqynyń mádenıetin damytýǵa atsalysýy qajet.

Baıqaý 5 atalym boıynsha ótedi:
- Qazaqstan qoǵamyndaǵy etnosaralyq kelisimdi nyǵaıtý;
- Qazaqstandyq patrıotızmdi nyǵaıtý jolyndaǵy memlekettik rámizderdiń rólin jarııalaý;
- Qazaqstan halqy Assambleıasynyń qyzmetin túsindirý;
- Qazaqstan etnostarynyń mádenıeti men salt-dástúrin damytý;
- memlekettik tildiń rólin kóterý.

Konkýrsqa qatysýshylar Mádenıet jáne aqparat mınıstrliginiń www.mki.gov.kz resmı saıtynda tirkelip, saýalnamany toltyrýy jáne konkýrstyq jumystaryn onlaın túrinde bekitýi qajet. Keń kólemdegi konkýrstyq jumystardy (10 Mb asa) [e-mail] nemese YouTube-qa tirkelgen elektrondyq meken-jaıǵa joldaý qajet.

2013 jyldyń 25 qyrkúıeginen bastap Mınıstrliktiń resmı saıtynda ashyq daýys berý bastalady. Daýys berý saıtta tirkelgennen keıin ǵana múmkin bolady. Onlaın daýys berý negizinde qazylar alqasy jeńimpazdardy 5 nomınatsııa boıynsha anyqtaıdy.

Jeltoqsan aıynda olardy Qazaqstan halqy Assambleıasynyń jáne Mádenıet jáne aqparat mınıstrliginiń baǵaly syılyqtarymen jáne qurmet gramotalarymen marapattaý rásimi ótetin bolady.