Etnojýrnalıstıka salasy boıynsha «Shańyraq» konkýrsy uıymdastyrylady
ASTANA. QazAqparat - QR Mádenıet jáne sport mınıstrligi jyldaǵy qalyptasqan dástúr boıynsha etnojýrnalıstıka salasyndaǵy «Shańyraq» shyǵarmashylyq konkýrsyn uıymdastyrady, dep habarlady vedomstvonyń baspasóz qyzmetinen.
Konkýrstyń maqsaty etnosaralyq salada qyzmet etetin jýrnalısterdi yntalandyrý arqyly qoǵamdaǵy etnosaralyq tatýlyq pen kelisimdi nyǵaıtý bolyp tabylady.
Konkýrsqa qazaqstandyq buqaralyq aqparat quraldarynyń tilshileri, etnomádenı birlestikterdiń, úkimettik emes uıymdardyń ókilderi, ǵylym jáne mádenıet qaıratkerleri, sarapshylar jáne jekelegen avtorlar qatysa alady.
Konkýrsqa qatysý úshin memlekettik jáne orys tilderinde baspa buqaralyq aqparat quraldary men Internet resýrstarynda 2014 jyldyń 1 qańtar men 6 qarasha aılary aralyǵynda jarııalanǵan maqalalar, tele-, radıobaǵdarlamalar qabyldanady.
Materıaldar 6 qazan men 6 qarasha aralyǵynda qabyldanady.
Konkýrsqa qatysýshylar jumystaryn uıymdastyrý komıtetine joldaı alady. Іrikteý 6 nomınatsııa boıynsha júrgiziledi jáne jeńimpazdar baǵaly syılyqtarmen marapattalatyn bolady. Tolyǵyraq aqparatty www.mki.gov.kz jáne www.allhistory.kz saıttarynan ala alasyzdar.
