Etnostardyń jer betindegi tirshilik mólsheri shamamen 1200-1600 jyl bolyp esepteledi - professor Serǵazy Qalıev
ALMATY. 3 qarasha. QazAqparat /Erlik Erjanuly/ - Ortaq muralardy etnostardyń ózindik ereksheligi boıynsha anyqtaýǵa bolady. Bul búgin Almatydaǵy Qazaqtyń Abaı atyndaǵy ulttyq pedagogıkalyq ýnıversıtetindegi Dıskýssııalyq klýbtyń «Qazaq etnopedagogıkasy - ulttyq tárbıeniń ǵylymı negizi» degen taqyryptaǵy alǵashqy májilisinde aıtyldy.
«Etnostar geografııalyq aımaqta, klımattyq, memlekettik-ekonomıkalyq jaǵdaılarǵa baılanysty belgili bir ýaqyt mólsherinde ómir súrip, ósip-órkendeıdi. Qazaq dalasynda budan 10-15 ǵasyr buryn ǵundar men saqtar ómir súrdi. Keıin bul eki halyqtyń birigýinen túrki taıpalary, al olardyń ózge taıpalarmen aralasýynan qazaq, ózbek, tájik, túrikmen, ázirbaıjan jáne taǵy basqa ulttar men ulystar paıda boldy. Etnostardyń jer betindegi tirshilik mólsheri shamamen 1200-1600 jyl bolyp esepteledi. Biraq túrli jaǵdaılarǵa baılanysty olardyń tarıhy birde uzaq, birde qysqa bolýy múmkin», - deıdi pedagogıka ǵylymynyń doktory Serǵazy Qalıev.
Ǵalymnyń aıtýynsha, etnostar mádenıetiniń tarıhyn anyqtaýda arheologııa, tarıh, etnografııa ǵylymdarynyń qyzmeti zor. Etnostar ózge mádenı muralardy da qabyldaı otyryp ósip-órkendeý kezeńin bastan ótkizip otyrady. Olardyń mádenıeti birkelki damymaıdy. Túrli jaǵdaılarǵa baılanysty ol birde baıaý, birde shapjań júrip otyrady.
