Etnosaıası sala máselelerin arnaıy kafedra zerttep keledi - Turar Shaıhıev
Onyń aıtýynsha, Assambleıanyń qoǵamdaǵy orny aıryqsha bolǵandyqtan, 2014 jyly ýnıversıtette arnaıy kafedra ashylǵan bolatyn.
Mundaǵy maqsat - etnosaıası salamen baılanysty pánderdi oqytýdy teorııalyq-ádistemelik qamtamasyz etý, osy baǵyttaǵy zertteýler men jobalardy qoldaý.
Qazirgi tańda kafedra ýnıversıtette 2017 jyly ashylǵan «Rýhanı jańǵyrý» ınstıtýtynyń quramynda Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynyń negizgi oılary men basym baǵyttaryn júzege asyrýǵa belsene aralasyp keledi.
Ǵalymnyń paıymdaýynsha, elimizde qoǵamdyq kelisim men jalpyulttyq tutastyqty saqtaýdyń mańyzy zor. Osy taqyryp aıasynda BQO ishki saıasat basqarmasynyń tapsyrysymen eki joba márege jetti. Mysaly, «Oblys turǵyndarynyń ulttyq biregeılikke qatysty kóńil-kúıleri» jobasyna baılanysty suhbatqa qatysqan batysqazaqstandyqtardyń basym kópshiligi búgingi ahýalǵa kóńili tolatynyn, ulttyq biregeılikti qoldaıtynyn bildirdi.
Ýnıversıtet rektory Nurlan Serǵalıev «Rýhanı jańǵyrý» baǵdarlamasyn júzege asyrý maqsatynda BQO QHA janynda qurylǵan ǵylymı-saraptamalyq top pen oblys ákimdigi janyndaǵy ǵylymı-saraptamalyq keńesiniń tóraǵasy bolsa, kafedrada jumys jasaıtyndardyń deni - osy qurylymdardyń músheleri. Sondyqtan kafedra atalmysh top pen keńestiń josparly jumystaryna turaqty qatysýda.
«Kúni búginge deıin óńirlik jobalyq keńse men BQO QHA hatshylyǵyna oblys ortalyǵy men aýdandardan túsken 142 shaǵyn jáne keshendi joba ýnıversıtet ǵalymdarynyń saraptamasynan ótti. 50-den astam joba óz kezegimen qaralmaqshy. Ǵylymı zertteý jáne saraptamalyq-taldaý jumystaryna jas ǵalymdar, magıstranttar men doktoranttar da tartylýda. Aldaǵy ýaqytta da Qazaqstan halqy Assambleıasy kafedrasy óz jumystaryn tyńǵylyqty atqara beretin bolady», - dedi Turar Shaıhıev.
