Etnosaralyq tatýlyqty nyǵaıtý jolynda etnomádenı ortalyqtardyń atqaratyn qyzmeti zor - maman

ASTANA. QazAqparat - Búgin Astanadaǵy Abaı qonaqúıinde «Yrys aldy - yntymaq» taqyrybynda «dóńgelek ústel» otyrysy ótti. Oǵan etnomádenı birlestikterdiń basshylary, Astana qalalyq ardagerler keńesiniń músheleri, memlekettik organdar qyzmetkerleri jáne qala jastary qatysty.

«Qazaqstan óziniń polıetnıkalyq qurylymy jaǵynan da, sol kóp ulttardyń birligin bekitip, yntymaǵyn nyǵaıtý saıasaty jaǵynan da álemdegi dara elderdiń biri. Óıtkeni táýelsizdiktiń eleń-alańynda bılik konfessııaaralyq jáne etnosaralyq máselelerge basa nazar aýdaryp, ulttar men ulystardyń bereke-birlikte qandaı da bolsyn qıyndyqty jeńýine úlken kóńil bóldi. Búginde sol saıasattyń jemisin kórip, kúlli álemge úlgi bolyp otyrmyz», - dep atap ótti otyrys barysynda Astana qalalyq ardagerler keńesiniń tóraǵasy Amangeldi Syzdyqov. Al Astana qalasy Qazaqstan halqy Assambleıasy hatshylyǵynyń bas mamany Gúlnar Taıgokovanyń aıtýynsha, etnosaralyq tatýlyqty nyǵaıtý jolynda etnomádenı ortalyqtardyń atqaratyn qyzmeti zor. Olar áleýmettik ınstıtýttar retinde túrli etnostar men dıaspora ókilderiniń rýhanı, mádenı qajettilikterin ótep kele jatyr. «Osy jolda Qazaqstan halqy Assambleıasy Astana qalasy boıynsha fılıalynyń kótergen júgi jeńil emes. Ol memlekettik organdar men etnomádenı birlestikter arasyndaǵy altyn kópir ispetti», - dedi ol. Aıta keteıik, búgingi tańda ultaralyq yntymaqty nyǵaıtýǵa ólsheýsiz úles qosyp otyrǵan Qazaqstan halqy Assambleıasyna 24 etnomádenı ortalyq kiredi.