Etnosaralyq máselelermen aınalysatyn Jetekshi jýrnalıst-sarapshylar klýbynyń birinshi otyrysy ótti
Atalmysh klýb Qazaqstan halqy Assambleıasy janyndaǵy turaqty jumys isteıtin keńestik-saraptyq jáne aqparattyq organ bolyp tabylady. Onyń quramyna etnosaralyq taqyrypty jaryqqa shyǵaratyn respýblıkalyq jáne jergilikti buqaralyq aqparat quraldarynyń jetekshi jýrnalısteri men etnosaralyq qarym-qatynastar salasyndaǵy sarapshylar kirip otyr. Klýbtyń tusaýkeseri 2009 jyldyń kúzinde ótken bolatyn.
Sarapshylar klýbynyń mindetteri ulttar arasynda tózimdilikti nyǵaıtýǵa atsalysý, memlekettegi etnosaralyq jáne konfessııaaralyq kelisimdi saqtaýǵa, azamattyq birlikti, patrıotızm men rýhanı-mádenı qaýymdastyqty qamtamasyz etýge baǵyttalady. Birinshi otyrys barysynda jıynǵa qatysýshylar aǵymdaǵy jyly qabyldanǵan Qazaqstannyń el birligi doktrınasyn júzege asyrý máselelerin, sondaı-aq birtutas aqparattyq keńistikti qurý máseleleri talqylandy.
«Táýelsizdiginen beri qaraı álemdik arenada naqty bir deńgeıdi baǵyndyrǵan Qazaqstandy halyqaralyq qaýymdastyqtyń moıyndaýy arta túsýde, elimizdiń álemdik bedeldi uıymdarǵa tóraǵalyq etýi sonyń aıǵaǵy. Bul rette Qazaqstannyń ult birligi, dinaralyq, konfessııaaralyq, etnosaralyq máselelerine halyqaralyq qaýymdastyqtyń nazary erekshe. Máselen, qoǵamdyq kelisimge baılanysty Kopengagen qalasynda álemniń aldyńǵy qatarly elderiniń ókilderiniń qatysýymen ótken alqaly jıynǵa Qazaqstan jetekshilik etti», - dedi Qazaqstan halqy Assambleıasy Tóraǵasynyń orynbasary Eraly Toǵjan.
Otyrys barysynda kásibı merekeleriniń qarsańynda etnosaralyq qatynastar tóńiregindegi máselelerdi keńinen jarııalaıtyn BAQ ókilderi marapattaldy.
