Etnosaralyq kelisim: Jambyl oblysynda pılottyq joba bastaý aldy
TARAZ. QazAqparat - Jambyl oblysynda «Beıbitshilik pen kelisim» pılottyq jobasy iske asyrylýda, dep habarlaıdy QazAqparat.
Joba aıasynda jergilikti atqarýshy, quqyq qorǵaý organdardan, sarapshylardan, qoǵamdyq uıym ókilderinen qurylǵan 5 jumys toby aımaqtaǵy etnostar jınaqy turatyn aýdandarda ultaralyq kelisim máselelerin anyqtap, naqty sharalar qabyldaýdy kózdeıdi.
Bul júıeli jumystar Baızaq, Jambyl, Qordaı, Merki, Shý aýdandarynda bir aıǵa jýyq merzimde iske asyrylmaq.
Máselen, «Aqparattyq-túsindirý» tobynyń músheleri Shý aýdanynda bolyp, azamattardy jeke máseleleri boıynsha qabyldaý ótkizip, etnomádenı birlestiktermen kezdesý, túrli sıpattaǵy mádenı, sporttyq, aqparattyq-túsindirý is-sharalar ótkizýdi kózdeıdi. Al «Áleýmettik-turmystyq máselelerdi sheshý» baǵytynyń jumys toby Qordaı aýdanyndaǵy Qordaı, Áljan ana, Sortóbe, Masanshy, Aýqatty, Qarasý jáne Sarybulaq aýyldarynyń turǵyndarymen kezdesip, turmystyq-jaǵdaıyn zerdelep, jastar, muǵalimder jáne dárigerlermen semınarlar ótkizip keledi.
Al, «Aýylda bıznesti damytý» baǵytyna Jambyl aýdany turǵyndary qyzyǵýshylyq tanytyp, uıymdastyrylǵan sharalarǵa belsendi qatysýda. Jumysshy top aýdan ortalyǵy Asa aýylynan bastaý alyp, aımaqtaǵy Qarakemer, Órnek, Ernazar, Qarasý, Qólqaınar, jáne t.b. aýyldyq okrýgterinde jalpy 17 is-shara uıymdastyrdy. Іs-shalaradyń kópshiligi aýyl turǵyndarymen kezdesý, turmystyq-jaǵdaıyn zerdeleý maqsatynda problemalyq kásiporyndardy aralaý jáne turǵyndardy bıznes bastamalaryn jınaqtap, granttyq nemese nesıelik qoldaýdy qarastyrýda. Qabyldaý barysynda aýdan boıynsha 600-ge jýyq adam qamtylsa, onyń ishinde 113 adam tıisti kómektermen qamtamasyz etildi. Al, 12 azamattyń máselesi baqylaýǵa alyndy.
Baızaq aýdanyndadestrýktıvti dinı baǵyttaǵy azamattardy ońaltý boıynsha jumysty kúsheıtip, «Din máselesi» boıynsha top kúmándi dinı aǵymdaǵy 40 azamatpen «Dinaralyq kelisim men otansúıgishtik» taqyryptarynda jeke kezdesýler ótkizdi. «Jýsan» gýmanıtarlyq operatsııasy aıasynda oralǵan 3 jasóspirimmen júzdesip, psıhologııalyq jáne teologııalyq portretteri qalyptastyryldy. Otbasynyń áleýmettik jáne turmystyq jaǵdaıy zerdelenip, arnaıy jospar jasaldy. Sarykemer jáne Býryl aýyldarynda aýdan turǵyndarymen de dinı saýattylyq máseleleri jóninde kezdesýler ótkizilip, aýyl turyǵndarynyń ótinish-tilekteri nazardan tys qalǵan joq.
«Zaıyrlylyq jáne dintaný negizderi» muǵalimderine dinı saladaǵy ózekti taqyryptarda semınar uıymdastyrylyp, maǵlumattar berildi.
Oblystyq «Hıbatýlla Tarazı» meshitiniń ımamdary tarapynan Baızaq aýdandyq meshitterdiń qarjylaı kiris-shyǵystaryna monıtorıng jasalyp, birqatar problemalyq máseleler anyqtalyp, onyń sheshý joldary qaralý ústinde.
Merki aýdany aýmaǵynda qoǵamdyq tártipti jáne jol qaýipsizdigin saqtaý maqsatynda «Quqyq qorǵaý salasy» toby shalǵaı aýyldarda quqyqtyq keńester kórsete otyryp, qoǵamdyq qabyldaý, quqyq buzýshylyqtardyń jolyn kesýge baǵyttalǵan reıdtik sharalardy ótkizdi.
Toptyń basynda júrgen oblystyq Polıtsııa departamenti qyzmetkerleri Qorǵanys isteri jónindegi oblystyq deparatmentimen aýdandaǵy áskerı qyzmetke qabyldanýshylarmen jáne olardyń ata-analarymen túsindirý jumystaryn júrgizýde. Al, Sybaılas jemqorlyqqa qarsy qyzmetiniń óńilderi aýyl turǵyndary arasynda áleýmettik saýalnama júrgizilip, jan-jaqty keńes berýde.
