Etnosaralyq qatynastardyń temperatýrasyna teris áser etýge qabiletti problemalarǵa kózdi jumbaýymyz kerek - Q. Saýdabaev
annyń 26-sy. QazAqparat /Ernur Aqanbaı/ - Búginde etnosaralyq qatynastardyń jáne bizdiń qoǵamnyń birliginiń temperatýrasyna teris áser etýge qabiletti problemalar men úrdisterge kóz jumbaýymyz kerek.
Búgin Astanada ótip jatqan Qazaqstan halqy Assambleıasy keńesiniń keńeıtilgen májilisinde QR Memlekettik hatshysy - Syrtqy ister mınıstri Qanat Saýdabaev osylaı málimdedi, dep habarlaıdy qazAqparat.
Onyń aıtýynsha, eń aldymen álemdik ekonomıkalyq-qarjylyq daǵdarys jaǵdaıynda kedeıshilik pen jumyssyzdyqty qosqanda, sóz joq áleýmettik-ekonomıkalyq problemaldar ýshyǵady. Bul rette birqatar áleýmettik problemalar etnıkalyq sıpat alýy múmkin. Bul eń aldymen sheteldik jumys kúshterin tartyp jatqan kásiporyndarǵa
qatysty. «Ekinshiden, teńdestirilgen jáne salmaqtalǵan til saıasatyn odan ári júrgizý, memlekettik tildiń qoldanysyn keńeıtý, is júrgizýlerdi memlekettik tilge kóshirýdiń ózekti máselelerin qarastyrý qajet. Úshinshiden, qazaqstandyq patrıotızmge tárbıeleý, azamattyq borysh sezimi jáne bizdiń ortaq Otanymyzǵa adaldyq - etnıkaralyq qatynastardy úndestirýdegi, etnıkaaralyq tózimdiliktiń qazaqstandyq modelin qalyptastyrýdaǵy mańyzdy faktor. Tórtinshiden, etnıkaaralyq tózimdilik máselesinde halyqtyń quqyqtyq mádenıetin kóterý qajet. Saraptama turmystyq ultshyldyq jáne qarapaıym tárbıesizdik pen ádepsizdik keı-keıde etnıkaralyq sıpatqa ıe bolatyn turmystyq jáne krımınaldyq daý-janjaldardyń negizgi sebepteri ekenin kórsetip otyr», dedi Q. Saýdabaev.
Osy oraıda qoǵam mundaı faktilerge qatań qaraýy tıistigin aıtqan ol: «Turmystyq ultshyldyqtyń kórinis tapqany úshin jaýapkershilikti kúsheıtetin quqyqtyq tetikter kerek. Bunda bizdiń etnomádenı birlestikter, Assambleıa keńesi belsendi jáne oń rol atqarýy tıis», dedi.
Q. Saýdabaev memleket eldegi beıbitshilik pen kelisimdi odan ári nyǵaıtýda óz tarapynan barlyq qajetti jaǵdaıdy jasaıtynyn atap kórsetti.
