Etnosaralyq qatynas salasynda jańa memlekettik saıasat qurý kerek - Áshimbaev
«Elimizdiń kópetnosty bolýy - bizdiń artyqshylyǵymyz jáne eldiń damýyna yqpal etetin strategııalyq resýrs. Bul – bizdiń álsizdigimiz emes, áli kúnge deıin barynsha qoldana almaı kele jatqan múmkindigimiz. Sondyqtan memleket, memlekettik organdar jáne Prezıdent Ákimshiligi Qazaqstanda turatyn barlyq etnıkalyq toptardyń damýyna, olardyń máselelerin sheshýge qoldaý kórsetedi», - dedi M.Áshimbaev elordada etnosaıasattyń ózekti máseleleri týraly dóńgelek ústelde.
Onyń aıtýynsha, Prezıdent Qasym-Jomart Toqaevtyń qazaq tiliniń ýaqyt óte kele elimizdegi ultaralyq qatynas tiline aınalýy qajettigi týraly tujyrymdamalyq ıdeıasynyń keleshegi zor. Bul – óte mańyzdy tezıs.
«Etnosaralyq qatynas salasyndaǵy memlekettik saıasatqa óte mańyzdy ózgerister qajet. Osy salada jumys isteıtin memlekettik organdaryń, qoǵamdyq ınstıtýttardyń jumysyn tekserý kerek. Taldaý men tekserý nátıjeleri boıynsha aldaǵy kezeńde etnosaralyq qatynas salasynda jańa memlekettik saıasat qurý kerek», - dedi Máýlen Áshimbaev.
Buǵan deıin Máýlen Áshimbaev Qordaı aýdanynda bolǵan qaıǵyly oqıǵa jóninde pikir bildirgen edi. Sondaı-aq, Qazaqstanda azamattardy tiline, dinine nemese áleýmettik jaǵdaıyna baılanysty kemsitýge jol berilmeıtinin málimdedi .
