Etnosaralyq qatynas máselesin eshqashan saıasat quralyna aınaldyrýǵa bolmaıdy - Prezıdent
ASTANA. KAZINFORM – Qazaqstanda kelisim, tózimdilik, dostyq uǵymdary qur uran emes, azamattardyń kúndelikti ómir saltyna aınalǵan qundylyq. Bul týraly Qazaqstan halqy Assambleıasynyń XXHІV sessııasynda Memleket basshysy Qasym-Jomart Toqaev aıtty.
- Sońǵy jyldary elimizdiń saıası-ıdeologııalyq kelbeti túbegeıli ózgerdi. Ekonomıkada júıeli reformalar qolǵa alyndy. Eń bastysy, qoǵamnyń sana-sezimi ózgere bastady. Keıingi jyldary saıası oqıǵalarǵa baǵa berý turǵysynan halqymyzdyń kózqarasy da jańa sıpatqa ıe boldy. Alǵa qaraı adymdap qadam basty deýge bolady. Biz zamanaýı jáne aldyńǵy qatarly qoǵamǵa aınaldyq. Munyń bári bizdegi qoǵamdyq kelisim úlgisine de tyń talaptar qoıady. Keshe ǵana tıimdi sanalǵan ádis-tásilder búgin jaramsyz bolýy múmkin. Bizge eskiliktiń izine qaıta túspeý úshin barlyq jetistikterimiz ben sátsizdikterimizdi tarazy basyna qoıyp, zerdeleý qajet. Eń áýeli, Assambleıa qyzmetiniń máni men mazmunyn qaıta qaraǵan jón. Meniń túsinigimde Assambleıa memlekettiń etnosaralyq saladaǵy barlyq jumysyna baǵyt beretin strategııalyq shtabqa aınalýy kerek, - dedi Qasym-Jomart Toqaev.
Memleket basshysy atalǵan naqty mindetterdi júzege asyrý ultaralyq qarym-qatynas sııaqty mańyzdy ári názik salada atqarylyp jatqan aýqymdy isterdi jańa mazmunmen tolyqtyratynyna senimdi ekenin basa aıtty.
- Ultaralyq kelisim men turaqtylyqty nyǵaıtý – memlekettik saıasattyń basty baǵyttarynyń biri jáne solaı bolyp qala beredi. Qazaqstanda kelisim, tózimdilik, dostyq uǵymdary qur uran emes, azamattardyń kúndelikti ómir saltyna aınalǵan qundylyq. Aýqymdy qaqtyǵystar, saýda soǵystary, adam ómiriniń qunsyzdanýy kezeńinde beıbitshiliktiń qadiri erekshe arta tústi. Óıtkeni, bul – damýdyń basty kepili. Barlyǵymyz qal-qadirimizshe beıbitshilikti saqtaýǵa atsalysamyz. Men buǵan deıin barlyq ákimderge turaqty túrde etnosaralyq, ultaralyq kelisim máselesine arnalǵan jınalys ótkizip turýdy tapsyrdym. Ortalyq jáne jergilikti atqarýshy organdar osy mańyzdy salany jiti nazarda ustaýy kerek. Etnosaralyq jáne konfessııaaralyq qatynas máselesin eshqashan saıasat nemese túrli arandatý quralyna aınaldyrýǵa bolmaıdy. Bul – memlekettiń de, búkil qoǵamnyń da buljymas qaǵıdasy, - dedi Prezıdent.
Elordadaǵy Táýelsizdik saraıynda Memleket basshysy Qasym-Jomart Toqaevtyń qatysýymen Qazaqstan halqy Assambleıasynyń kezekti HHHІV sessııasy ótip jatyr.