Etnograf Aqedil Toıshanuly Mońǵolııanyń «Dostyq» ordenimen marapattaldy

ASTANA. QazAqparat – Mońǵolııanyń Qazaqstandaǵy elshiliginde Qazaqstan ǵalymy Aqedil Toıshanuly men saıasatker Orman Nurbaev marapattaldy, dep habarlaıdy QazAqparat tilshisi.

Marapattaý saltanatyna Mońǵolııa Premer-mınıstriniń orynbasary Saıanbýıan Amarsaıhan arnaıy kelse, Qazaqstan tarapynan QR Aqparat jáne qoǵamdyq damý mınıstri Darhan Qydyráli qatysty.

Marapattaý sharasy Qazaqstan men Mońǵolııa arasyndaǵy dostyq qarym-qatynastyń 30 jyldyǵyna oraı uıymdastyrylǵanyn aıta ketý kerek.

Atap aıtsaq, Halyqaralyq Túrki akademııasynyń ǵylymı qyzmetkeri, ǵalym Aqedil Toıshanuly Mońǵolııa Prezıdentiniń Jarlyǵy boıynsha «Dostyq» ordenimen marapattaldy.

«Mońǵolııa men Qazaqstan yntymaqtastyǵynyń damýyna qosqan eleýli úlesi úshin Halyqaralyq Túrki akademııasynyń sarapshysy, ǵalym Aqedil Toıshanuly Mońǵolııanyń «Dostyq» ordenimen marapattalsyn. Mońǵolııa Prezıdenti Ý. Húrelsúhtiń №124 Jarlyǵy Ulanbatyr qalasy 2022 jylǵy shilde», - dep jazylǵan marapattaý Jarlyǵynda.

Sondaı-aq, QazaqGeography qoǵamynyń atqarýshy dırektory Orman Nurbaev Mońǵolııanyń «Altyn juldyz» ordenine ıe boldy.

«Mońǵolııa men Qazaqstan qarym-qatynasynyń damýyna qosqan zor úlesi úshin QazaqGeography qoǵamynyń atqarýshy dırektory Orman Nurbaev «Altyn juldyz» ordenimen marapattalsyn. Mońǵolııa Prezıdenti Ý.Húrelsúhtiń №124 Jarlyǵy», - dep jazylǵan qujatta.