Etno-mádenı birlestikter «Qazaq halqyna alǵys kúni» merekesin atap ótýdi usynýda
Bul týraly búgin Ortalyq kommýnıkatsııalar qyzmetinde ótken baspasóz máslıhatynda «Qoǵamdyq kelisim» RMM dırektory Natalıa Kalashnıkova málim etti.
Aıta keteıik, «Úlken el - úlken otbasy» jobasyn Elbasy «100 naqty qadamnyń» 86 qadamynda tapsyrǵan bolatyn. N.Kalashnıkovanyń aıtýynsha, bul joba halqymyzdyń birtektiligin qalyptastyrýǵa baǵyttalǵan.
«Halqymyzdyń birtektiligin qalyptastyrý úderisi máńgi júredi. «Úlken el - úlken otbasy» jobasynyń qaǵıdattaryn qurý, sharalar josparyn jasaqtaý boıynsha jumystar bastaldy. Mysaly, «Qazaq halqyna alǵys kúni» ataýly merekesin atap ótý, áleýmettik kómek kórsetý boıynsha «Qaıyrymdylyq kerýeni» sharasyn ótkizý, Jibek jolyna qatysty suhbat alańdaryn qurý sııaqty jobalar qolǵa alynady. Memlekettik áleýmettik seriktestik negizinde oǵan etno-mádenı birlestikterdiń basshylary men músheleri belsendi qatysady», - dep atap ótti Natalıa Kalashnıkova.
Mekeme dırektorynyń sózine qaraǵanda, qazirgi ýaqytta elimizde 900-den astam etno-mádenı birlestikter bar. Olardyń árqaısysy Qazaqstannyń qoǵamdyq kelisimin bekitip qana qoımaı, elimizdiń mádenı sanalýandylyǵyn damytýǵa, azamattyq birtektilik qaǵıdattardyń ornaýyna úlken úlesterin qosyp jatyr.
«Osy turǵyda etno-mádenı birlestikter men assambleıanyń qoǵamdyq uıymdary osy jobanyń róli men mańyzyn belsendi talqylaýda. Sonymen qatar Memleket basshysynyń «100 naqty qadam» aıasynda taǵy bir tapsyrma - jalpymemlekettik mindetterdi oryndaýǵa etno-mádenı birlestikterdi qatystyrý oryndalýda», - deıdi ol.
