Etnıkaralyq jáne konfessııaaralyq qatynastyń qazaqstandyq modelin álemge keńinen taratý qajet - Prezıdent
annyń 26-sy. QazAqparat /Ernur Aqanbaı/ - Etnıkaralyq jáne konfessııaaralyq qatynastyń qazaqstandyq modelin álemge keńinen taratý qajet.
Búgin Astanada ótken Qazaqstan halqy Assambleıasynyń 15-shi sessııasynda N. Nazarbaev osylaı aıtty, dep habarlaıdy.
Elbasynyń aıtýynsha, osy maqsatta etnıkaralyq jáne konfessııaaralyq tózimdilik taqyryby sheshýshi basymdyq bolyp tańdalǵan EQYU-ǵa Qazaqstannyń aldaǵy tóraǵalyǵyn paıdalaný mańyzdy bolyp tabylady. Bul «Eýropaǵa jol» memlekettik baǵdarlamasynda kórinis tapqan. «Assambleıanyń hatshylyǵy ultaralyq kelisimniń qazaqstandyq tájirıbesin jınaqtap, negizgi eýropalyq tilderde «Qazaqstan: Birlik pen kelisimniń yqpaldasý qalpy» degen taqyrypta arnaıy kitap shyǵarýy qajet», dedi N. Nazarbaev.
Elbasy Qazaqstan Astanada EQYU memleket basshylarynyń sammıtin ótkizý týraly bastama kótergenin aıta kele: «Onda etnıkaralyq jáne konfessııaaralyq kelisimdi qamtamasyz etý jónindegi is-qımyl baǵdarlamasyn qatysýshy memleketterdiń qaýipsizdigin qamtamasyz etýge baǵyttalǵan kún tártibiniń jeke tarmaǵy retinde qarastyrý qajet. Bul ıdeıa uıymdaǵy bizdiń kóptegen áriptesterimizdiń qoldaýyna ıe bolýda», dedi.
«Kelesi jyly Qazaqstannyń bastamasy boıynsha BUU jarııalaǵan Halyqaralyq mádenıetterdiń jaqyndasý jylyna arnalǵan konferentsııany ótkizý josparlanyp otyr. Osy máselelerdiń barlyǵyna Qazaqstan halqy Assambleıasy belsene qatysýy tıis», dedi N. Nazarbaev.
