Etnıkalyq qazaq Ózbekstandaǵy biregeı teatrdyń dırektory bolyp taǵaıyndaldy

ASTANA. KAZINFORM — Mádenıet mınıstri Ozodbek Nazarbekovtiń tıisti buıryǵyna sáıkes, Ózbekstandaǵy biregeı óner ordasy — Álisher Naýaı atyndaǵy Ózbekstan memlekettik akademııalyq úlken teatrynyń dırektory bolyp Álibek Qabdyrahmanov taǵaıyndaldy. Bul týraly Mádenıet mınıstrliginiń baspasóz qyzmeti habarlady. 

29 shilde kúni Mınıstrlik ǵımaratynda Ózbekstan Mádenıet mınıstri Ozodbek Nazarbekovtiń tóraǵalyǵymen kezekten tys jıyn ótti. Jıynda uıymdastyrý máseleleri talqylandy. Jıynǵa mınıstrdiń birinshi orynbasary Avazhon Tojıhonov, mınıstrliktiń ortalyq apparatynyń ókilderi, óńirlik stýdııalardan sala ókilderi qatysty.

Jıyn barysynda Ózbekstannyń Álisher Naýaı atyndaǵy Memlekettik akademııalyq úlken teatrynyń dırektory, Ózbekstannyń halyq ártisi Ramız Ýsmonovtyń basqa jumysqa aýysýyna baılanysty Mádenıet mınıstriniń tıisti buıryǵymen teatr dırektory qyzmetine taǵaıyndalǵan Álibek Qabdyrahmanov ujymǵa tanystyryldy.

Mınıstr Ozodbek Nazarbekov Álibek Qabdyrahmanovtyń jumysyna sáttilik tilep, onyń bilimi men talantyn salany damytýǵa jumsaıtynyna senim bildirdi.

Mınıstrdiń birinshi orynbasary Avazhon Tojıhonov ta Álibek Qabdyrahmanovty jańa qyzmetke taǵaıyndalýymen quttyqtap, qyzmetine tabys tiledi.

Álibek Qabdyrahmanov 1984 jyly Tashkentte dúnıege kelgen. Etnıkalyq qazaq. Ózbekstan memlekettik konservatorııasynyń «Urmaly aspaptar» fakýltetinde oqyǵan.

Jetistikteri:

• Mádenıet salasyndaǵy «Tasanno» syılyǵynyń 2 dúrkin laýreaty (Ózbekstan, 2005, 2007)
• «Shabyt» halyqaralyq baıqaýynyń Gran-prı ıegeri (Astana, Qazaqstan, 2007 j.)
• «EMCY Art for music Prize» halyqaralyq baıqaýynyń «Orkestrmen eń jaqsy oryndaýy úshin» nomınatsııasy boıynsha arnaıy júlde (Germanııa, 2006 j.)
• Mıýnhendegi «EMCY Art for music Prize» halyqaralyq baıqaýynyń 2-oryn ıesi (Germanııa, 2006 j.)
• Astanada ótken Halyqaralyq «Shabyt» baıqaýynyń 2-oryn ıesi(Qazaqstan, 2004 j.)
• Nıkolaı Stasınevıch atyndaǵy 2-halyqaralyq konkýrstyń dıplomanty, Varshava, (Polsha, 2004 j.)
• Jenevadaǵy 57-halyqaralyq baıqaýdyń dıplomanty (Shveıtsarııa, 2002 j.)
• Respýblıkalyq jas oryndaýshylar baıqaýynyń dıplomanty (Ózbekstan, 2001 j.)

Dırektor bolyp taǵaıyndalǵanǵa deıin Ózbekstanǵa eńbek sińirgen ártis Álibek Qabdyrahmanov Ózbekstan memlekettik fılarmonııasy ulttyq sımfonııalyq orkestriniń bas dırıjeri bolyp istegen.

Eske sala keteıik, ózbekstandyq qazaq boksshy Golden Boy promoýshenimen kelisimshartqa otyrǵany jaıly jazǵan edik.