Etnıkalyq qazaq balalaryna arnalǵan «Jas Qazaq» jazǵy-etno lageri jumysyn bastady
ASTANA. KAZINFORM – Qazaqstan Respýblıkasy Syrtqy ister mınıstrligine qarasty «Otandastar qory» KEAQ uıymdastyrýymen jáne IQanat qorynyń qoldaýymen shetelde turatyn etnıkalyq qazaq balalaryna arnalǵan jazǵy etno-lageri jumysyn bastady.
Otandastar qorynyń «Jas Qazaq» jazǵy etno-lageri tórtinshi ret uıymdastyrylyp otyr. Osyǵan deıin 400-den asa qandas balalar qatyssa, bıyl Reseı, Mońǵolııa, Ózbekstan, Qyrǵyz Respýblıkasy, Qytaı, Ońtústik Koreıa jáne Iran elderinen kelgen 255 etnıkalyq qazaq balalarynyń basyn qosty. Qatysýshylardyń arasynda tótenshe jaǵdaı kezinde qazaqstandyq dostaryna jylý jınaǵan mońǵolııalyq qazaq balalary, qoǵamnyń túrli baıqaýlaryna qatysyp, bilimderi men biliktilikterin dáleldegen qarakóz qandastarymyz bar.
Lager 2024 jylǵy 24 maýsym jáne 7 shilde aralyǵynda Býrabaıdaǵy «IQanat High School of Burabay» mektebi bazasynda ótedi. Balalar eki aptada qazaq tili, tarıhy men salt-dástúrin úırenip, ulttyq oıyndar men mýzykalyq aspaptarda oınaıdy, atqa minip, kıiz úı qurady, elimizdegi joǵary oqý oryndarynyń qatysýymen ótetin bilim kórmesine qatysady jáne eń bastysy álemniń kóptegen elinen dostar tabady.
25 maýsym kúni lagerdiń resmı ashylý saltanatyna Májilis depýtattary Bolat Kerimbek jáne Nurgúl Taý, Rossotrýdnıchestvonyń Astanadaǵy ókildik basshysy Olga Fılonova, «Otandastar qory» KEAQ prezıdenti Danııar Qadyrov jáne IQanat mektebiniń dırektory Zaıken Janat qatysyp, balalarǵa aqjarma tilekterin bildirdi.
Aıta keteıik, Qazaqstan Respýblıkasy Syrtqy ister mınıstrligine qarasty «Otandastar qory» kommertsııalyq emes aktsıonerlik qoǵamy (Qoǵam) shetelde turatyn otandastarymyzǵa júıeli túrde mádenı-gýmanıtarlyq jáne aqparattyq-konsýltatsııalyq qoldaý kórsetip keledi. Etnıkalyq qazaq balalaryna túrli tanymdyq jobalardy uıymdastyrý olardyń atamekenin tanyp-bilýine ońtaıly múmkindik týǵyzyp otyr.
