Etnıkaaralyq taqyrypta jazatyn jýrnalıster mamandarmen ózara baılanysta bolýy qajet - E.Toǵjanov
ASTANA. 18 qarasha. QazAqparat - Etnıkaaralyq taqyrypta qalam tartatyn jýrnalıster mamandarmen ózara baılanysta bolýy qajet.
Bul pikirdi búgin L.Gýmılev atyndaǵy Eýrazııa ulttyq ýnıversıtetinde «Etnomádenıet jáne BAQ» taqyrybynda ótken Qazaqstan halqy Assambleıasy janyndaǵy etnıkaaralyq qatynastar máseleleri jónindegi sarapshylar men Jetekshi jýrnalıster klýbynyń otyrysynda Assambleıa tóraǵasynyń orynbasary - Hatshylyq meńgerýshisi Eraly Toǵjanov bildirdi.
«Etnojýrnalıstıkanyń ózindik ereksheligi bar. Bıliktiń, qoǵamnyń, onyń ishinde jýrnalıstik qaýymdastyqtyń, tolyqtaı alǵanda azamattyq qoǵam ınstıtýttarynyń, sondaı-aq Qazaqstan halqy Assambleıasynyń ózara árekettesýiniń nátıjesinde ǵana biz ortaq túsinistikke qol jetkize alamyz», - dedi E.Toǵjanov.
Ol sonymen qatar qazaqstandyq BAQ-tarda etnıkaaralyq salany jazyp kórsetý ótken jyldarmen salystyrǵanda múmkindiginshe júıeli sıpatqa ıe bolyp otyrǵandyǵyn basa aıtty. Onyń pikirinshe, etnıkaaralyq qatynas máselesine qalam tartý úshin tilshi sol salaǵa mamandanýy jáne materıaldardy daıyndaý barysynda bilikti mamandardan keńes alýy qajet.
