Etna janartaýy atqylap, Sıtsılııadaǵy áýe qatynasyna kedergi keltirdi
ASTANA. KAZINFORM – Italııanyń Sıtsılııa aralyndaǵy Etna janartaýynyń kezekti atqylaýy áýe qatynasyna áser etti. Kúldiń kóp mólsherde taralýy men lavanyń atqylaýyna baılanysty Katanııa áýejaıynda ushaqtardy qabyldaýǵa shekteý engizildi, dep habarlaıdy BILD.
8 tamyzda Etna janartaýy belsendiliktiń jańa kezeńine ótti. Janartaý mańynda kúl men tútin qarqyndy atqylap, Sıtsılııa aspanyn úlken bult basqan.
Osyǵan baılanysty Katanııa áýejaıy bastapqyda barlyq keletin reısterdi qabyldaýdy toqtatty. Al ushyp shyǵatyn reısterdi qalypty keste boıynsha oryndaý josparlanǵan.
– Jolaýshylarǵa áýejaıǵa barar aldynda áýe kompanııalarynan óz reısteriniń mártebesin tekserý usynylady. Jaǵdaı kúl bultynyń taralý baǵytyna baılanysty ózgerýi múmkin, – delingen habarlamada.
Shekteýler Sıtsılııadaǵy eń iri áýejaılardyń birine áser etti. 2024 jyly Katanııa áýejaıy 12,3 mln-nan astam jolaýshyǵa qyzmet kórsetken.
Etnanyń atqylaýy óńirdegi áýe qatynasyna turaqty túrde áser etedi. Janartaý kúli ushaqtarǵa qaýip tóndiretindikten, ol áýejaı mańyna taraǵan jaǵdaıda bılik áýe qozǵalysyn shekteýi nemese ýaqytsha toqtatýy múmkin.
Etna – Eýropadaǵy eń bıik belsendi janartaý jáne álemdegi eń belsendi janartaýlardyń biri. Bıyl shildede onyń atqylaýyna baılanysty Katanııa áýejaıynda 120-ǵa jýyq reıs toqtatylyp, taǵy 60-tan astam reıs Sıtsılııanyń basqa áýejaılaryna baǵyttalǵan.
2 maýsymda da Etna atqylap, janartaý kraterinen birneshe shaqyrym bıiktikke qoıý tútin men kúl kóterilgen edi.
Aıta keteıik, ótken jyldyń sońynda da da Sıtsılııada Etna janartaýy qaıta atqylaı bastaǵanyn jazdyq.
