Etke degen suranys artty: álemdegi jaǵdaı Qazaqstanǵa qalaı áser etti
ASTANA. KAZINFORM – Búgin Úkimet otyrysynan keıingi baspasóz máslıhatynda Saýda jáne ıntegratsııa mınıstri Arman Shaqqalıev et baǵasyna qandaı faktorlar áser etip otyrǵanyn túsindirdi.
Mınıstrdiń aıtýynsha, baǵanyń ósýine qaramastan, naryqtaǵy jaǵdaı turaqty kúıinde qalyp otyr.
- Búginde baǵa dınamıkasy qalypty ósý deńgeıin baıqatty. Ósim bar, biraq ol birkelki deńgeıde. Eń bastysy – satylymda et bar. Máselen, biz ótken demalys kúnderi naryqtaǵy baǵaǵa monıtorıng júrgizdik: súıekti sıyr etiniń baǵasy – 3 700 teńge. Bólshek saýda jelilerinde baǵa sál joǵarylaý. Aýyl sharýashylyǵy mınıstrligimen birlese otyryp, negizgi máselelerdi sheship jatyrmyz, – dedi A.Shaqqalıev.
Mınıstr ınflıatsııanyń sebepteriniń biri retinde sheteldik naryqtardaǵy, sonyń ishinde Taıaý Shyǵystaǵy oqıǵalardy atap ótti.
- Baǵanyń ósý sebepteri belgili. Qazirgi ýaqytta etke degen jalpy suranystyń óte joǵary ekenin baıqap otyrmyz. Byltyr Dúnıejúzilik azyq-túlik uıymynyń sıyr etin álemdik tutynýǵa qatysty derekterin zerdeledik. Parsy shyǵanaǵyndaǵy oqıǵalar qoı eti baǵasynyń qubylmalylyǵyna áser etti. Degenmen qazirgi kezde baǵanyń kúrt aýytqýy baıqalǵan joq. Baǵalar rasymen de ózgerip turady, biraq jalpy alǵanda turaqty jáne qazirgi ýaqytta mal sharýashylyǵy ónimderin jetkizýde eshqandaı irkilis joq, - dedi vedomstvo basshysy.
Et ónimine degen jahandyq suranystyń joǵary bolýy baǵanyń ósýine jáne qoı etin tutyný kóleminiń artýyna da yqpal etti.
- Shynynda da, Qytaı men Afrıkada tutyný aıtarlyqtaı artty. Jalpy alǵanda, búkil álemde suranys ózgerip jatyr. Elimiz jahandyq protsesterdiń ajyramas bóligi ekeni túsinikti. Eger Ózbekstanda suranys artsa, onda bıznes ókilderi sol naryqty tańdaıtyn bolady. Baǵa tek tutynýshy úshin ǵana emes, sonymen qatar óndirýshi úshin de ádil bolýy tıis dep árdaıym aıtyp kelemiz. Bul tepe-teńdikti naryq qalyptastyrady. Sondyqtan eksportqa degen suranys joǵary, ıaǵnı bul jaǵdaı baǵanyń qubylýyna áser etedi, - dep túsindirdi mınıstr.
Tt óniminiń eksporty 50 paıyz óskenin jazǵan edik.
