Atyraý oblysynda 18 gektar aýmaqta qamys pen qopa áli byqsyp jatyr

ATYRAÝ. KAZINFORM — Atyraýdy basyp qalǵan kúıik ıisine sebep bolǵan órt qala aýmaǵynda sóndirilgenimen aýdanda áli byqsyp jatyr.

6 qazan kúni keshkilik ýaqytta Atyraý qalasynan Kaspıı teńizine qaraı 20 shaqyrym jerde jalpy aýdany 1 ga qurǵaq shóp órtendi.

Bul oshaqty TJD qyzmetkerleri 23:00 shamasynda anyqtaǵan. Órt 7 qazan túngi 01:12–de tolyq sóndirildi.

Búgin, 7 qazan kúni qala aýmaǵynda tútin ıisi sezilýine baılanysty barlaý jumystary júrip jatyr. Alaıda eshqandaı órt oshaǵy anyqtalmady.

Atyraý oblystyq TJD Qurmanǵazy aýdanyndaǵy Qurmanǵazy aýylynan 67 shaqyrym jerde Jarkasa kanalynyń qarsy betinde, Kaspıı teńiziniń jaǵalaýynda jalpy aýdany 30 ga bolatyn qamys pen qopanyń byqsyp jatqanyn habarlady.

Oqıǵa ornynda 31 adam men 5 tehnıka jumys istep jatyr.

Búginde 12 gektarda órt tolyq aýyzdyqtalǵan. Qyzyl jalyndy sóndirý jumysy jalǵasyp jatyr. Eldi mekenderge qaýip joq.

Eske sala keteıik, keshe túnde Atyraýda jaılaǵan kúıik ıisine baılanysty jedel shtab otyrysy ótken bolatyn.