Etıka isi: Taıland soty premer-mınıstrdiń taǵdyryn 29 tamyzda sheshedi

ASTANA. KAZINFORM — Taıland Konstıtýtsııalyq soty Phethongthan Chınavat isi boıynsha sheshimdi 29 tamyzda shyǵarady, dep jazady Sınhýa.

Taıland Konstıtýtsııalyq soty sársenbi kúni málimdeme jasap, etıkalyq normalardy buzdy degen aıyppen ýaqytsha qyzmetinen shettetilgen premer-mınıstr Phethongthan Chınavatqa qatysty sheshimdi 29 tamyzda jarııalaıtynyn habarlady.

Sottyń málimetinshe, 21 tamyzda eki kýágerdiń, onyń ishinde Phethongthan Chınavat pen Ulttyq qaýipsizdik keńesiniń bas hatshysynyń qatysýymen tyńdaý ótedi.

Taraptar — talapker nemese jaýapker — eger qorytyndy dálel keltirgisi kelse, 27 tamyzǵa deıin sotqa jazbasha nusqada usynýy qajet.

Aıta keteıik, 1 shildede sot senatorlar tobynyń talap-aryzyn qabyldaǵannan keıin Phethongthan Chınavatty qyzmetinen ýaqytsha shettetý týraly sheshim shyǵarǵan bolatyn. Bul talap úkimet pen Kambodja arasyndaǵy shekara máselesine qatysty jasyryn telefon áńgimesiniń jarııa bolyp ketýimen baılanysty týyndaǵan.

Byltyr tamyzda 37 jastaǵy Phethongthan Chınavat korol Vachıralongkornnyń resmı maquldaýyn alǵannan keıin Taılandtyń eń jas premer-mınıstri bolyp taǵaıyndaldy.

Phethongthan — burynǵy premer-mınıstr Taksın Chınavattyń kenje qyzy. Ol 2001-2005 jáne 2011-2014 jyldary bul qyzmette bolǵan ákesi men tátesi Iınglak Chınavattyń izin jalǵastyryp otyr. Saılaý qorytyndysy boıynsha ol — eldi basqaratyn ekinshi áıel jáne Chınavat otbasynyń osy laýazymdy atqarǵan úshinshi múshesi.