Etigine esirtki jasyryp ótpek bolǵan jigit shekarada ustaldy
ASTANA. QazAqparat - Qazaq-ózbek shekarasynda ornalasqan «Qaplanbek-avto» baqylaý-ótkizý beketiniń shekarashylary keshe keshki saǵat altynyń shamasynda ıisshil ıttiń kómegimen 34 jastaǵy Qazaqstan Respýblıkasynyń azamatyn ustady.
Qyzmettik ıt atalǵan azamattyń aıaqkıiminde esirtkiniń bar ekendigin bildirdi, dep habarlaıdy QR UQK ShQ baspasóz qyzmeti.
Amal joq, álgi azamat aıaqkıimin sheshýine týra keldi. Ittiń belgisi týra bolyp shyqty - aıaqkıim ishinen 151,3 gramm marıhýana tabyldy. Esirtkiniń jasyryp Ózbekstanǵa alyp ótpek jerlesimizdiń qýlyǵy iske aspady.
