Et baǵasyn turaqtandyrý úshin ne istelinip jatyr
ASTANA. KAZINFORM — Aýyl sharýashylyǵy vıtse-mınıstri Azat Sultanov ishki naryqta et baǵasyn turaqtandyrý úshin qandaı sharalar qolǵa alynǵanyn aıtty.
Úkimet otyrysynan keıingi brıfıngte BAQ ókilderi vıtse-mınıstrge keıbir sarapshylardyń elimizde ettiń 1 kelisi 15-20 myń teńgege jetýi múmkin degen boljamyn aıtyp, paıymyn suraǵan edi. Saýalǵa jaýap bergen vıtse-mınıstr mundaı tujyrymmen túbegeıli kelispeıtindigin basa aıtty. Degenmen, elimizdiń aýyl sharýashylyǵy laıyqty deńgeıde damymaı otyrǵanyn da jasyrmady.
— Osyǵan oraı Memleket basshysy mal sharýashylyǵyn keshendi damytý josparyn ázirlep, bekitý týraly naqty tapsyrmany júktedi. Onda óndiristiń qajetti kólemine, onyń ishinde et boıynsha da qajetti óndiris kólemine qol jetkizý boıynsha naqty ındıkatorlar, mindetter, josparlar kózdelýi tıis. Barlyq sala memlekettik qoldaýmen, jeńildetilgen qarjylandyrýmen, sonymen qatar eksportqa qoldaý kórsetýmen qamtylady. Nátıjesinde aldaǵy ýaqytta mal basy, onyń ishinde iri qara sany eselep artady, — dedi ol.
Vıtse-mınıstr Qazaqstannyń sıyr etine Ortalyq Azııada suranystyń óte joǵary ekenin aıtty.
— Ázirshe, Eýropa naryǵyn ashqan joqpyz. Qytaımen belsendi yntymaqtastyqty jolǵa qoıdyq. Túrkııa naryǵy biz úshin qyzyqty. Óıtkeni, bul naryqta sıyr etiniń baǵasy óte joǵary. Sondyqtan biz osynaý dúrlikpe suranystyń ishki naryqqa yqpal etýine jol bermeýdi aldymyzǵa maqsat etip qoıdyq, — dedi Azat Sultanov.
Sondaı-aq ol bul maqsatqa qalaı jetkiziletinin aıtty.
— Bıyldyń ózinde asyl tuqymdy jáne taýarlyq mal basyn satyp alýǵa arnalǵan jeńildetilgen qarjylandyrý baǵdarlamasyn iske qostyq. Sýbsıdııa normatıvin arttyrdyq. Bul eń aldymen mal basyn dástúrli naryqtardan ákelý úshin jasaldy, — dedi vıtse-mınıstr.
Azat Sultanov sıyr etin ózge memleketterden ımporttap otyrmyz deý durys emestigin atap ótti.
— Ózderińiz de bilesizder, ımport bar bolǵanymen ol mardymsyz. Ol negizinen konservileý ónimder shyǵarýǵa ketedi. Aýyl sharýashylyǵy óndirýshiler nemese tutynýshylar sıyr etin jappaı satyp ákelip jatqan joq, — dedi ol.
Aýyl sharýashylyǵy mınıstri Aıdarbek Saparov et baǵasy kelesi jyly da qazirgi deńgeıde saqtalý kerek ekenin aıtqan.