Et jáne et ónimderi 16 paıyzǵa qymbattady

ASTANA. QazAqparat - Bıylǵy qańtar-qyrkúıekte respýblıkada 1,3 mln tonna daıyn jem-shóp óndirildi. Bul bir jyl burynǵydan 11,8 paıyzǵa az, dep habarlaıdy QazAqparat tilshisi.

Ranking.kz portalynyń deregine qaraǵanda, óndiristiń basym bóligi Almaty oblysyna tıesili - 347,3 myń tonna. Bir jylda óndiris kólemi 3 paıyzǵa artqan. Úzdik úshtikke Aqmola (223,8 myń tonna, 0,5 paıyz azaıǵan) jáne Soltústik Qazaqstan (161,1 myń tonna, 18,4 paıyzǵa kóbeıgen) oblystary da kirdi.

1 qazanǵa deıin respýblıkada 9 mln bas iri qara mal boldy. Bul bir jyl burynǵydan 4,7 paıyzǵa kóp. Basqa túlik túrleriniń de sany artyp keledi. Jylqy 3,8 mıllıonǵa, túıe 265,3 myńǵa, qoı 21 mıllıonǵa, qus 50 mıllıonǵa jetti.

Qazan aıynyń qorytyndysynda et jáne et ónimderiniń baǵasy bir jylda birden 15,9 paıyzǵa artty. Onyń ishinde et jáne qus eti — 14,6, shujyq ónimderi — 21,3%, basqa da et ónimderi 15,7 paıyzǵa qymbattady.

Bir jylda sıyr etiniń baǵasy — 9,3, jylqy eti — 16,3, shoshqa eti — 13,4, qoı eti — 12,5, qus eti 28,6 paıyzǵa, shujyq ónimderiniń ishinde pisirilgen shujyqtar - 22,2, jartylaı ystalǵan shujyqtar 21,2 paıyzǵa kóterildi.

Óńirlerdiń ishinde Mańǵystaý oblysynda et jáne et ónimderi jyl ishinde birden 22,6 paıyzǵa qymbattaǵan. Odan keıingi orynda Pavlodar (20%) jáne Aqtóbe (19,5%) oblystary tur.

Qazan aıynda dúkender men bazar sórelerinde sıyr etiniń kelisi orta eseppen - 2,4 myń, qoı eti — 2,7 myń, shoshqa eti — 2 myń, jylqy eti — 3 myń, taýyq eti — 1,4 myń, taýyq san eti — 1,2 myń, qaınatylǵan shujyq — 2,6 myń, jartylaı ystalǵan shujyq — 3,1 myń teńgeden satyldy.