Et óndirisiniń artýy ishki naryq suranysyn qamtamasyz etip otyr
ASTANA. KAZINFORM — Shalǵaıdaǵy mal sharýashylyǵyn damytýǵa baǵyttalǵan «Jaılaý» jeńildetilgen nesıeleý baǵdarlamasy iske qosylyp jatyr. Baǵdarlama aıasynda nesıe jyldyq 6%-ben 10 jyl merzimge beriledi.
Mal sharýashylyǵy salasynda turaqty oń dınamıka saqtalyp otyr. Negizgi aýyl sharýashylyǵy janýarlarynyń barlyq túri boıynsha mal sany ósip, mal sharýashylyǵy ónimderin óndirý kólemi de ulǵaıyp jatyr.
2026 jylǵy 1 mamyrdaǵy jaǵdaı boıynsha iri qara mal ótken jyldyń sáıkes kezeńimen salystyrǵanda 325,2 myńǵa ósip, 9,8 mln-ǵa jetti. Qoı sany 23,5 mln bolyp (+363,1 myń), jylqy — 5,1 mln (+339,8 myń), túıe — 322 myń (+7,5 myń), qus sany — 48,2 mln (+291,5 myń).
Maldyń ósýi mal sharýashylyǵy ónimderin óndirý kóleminiń artýyna yqpal etip otyr. Bıyl qańtar–sáýir aılarynda barlyq et túri boıynsha óndirý kólemi 338,2 myń tonna bolyp, 2025 jyldyń sáıkes kezeńimen salystyrǵanda 11 myń tonnaǵa artty.
Atap aıtqanda, sıyr etin óndirý kólemi 112,9 myń tonnaǵa jetip, 6,5 myń tonnaǵa ulǵaıdy. Qoı etin óndirý 34,7 myń tonna (+2,6 myń tonna), jylqy etin óndirý 39,8 myń tonna (+1,4 myń tonna) boldy.
Óndiris kólemin odan ári arttyrýǵa múmkindik bar. Osy maqsatta jaıylymdyq ınfraqurylymdy qamtamasyz ete otyryp, shalǵaıdaǵy mal sharýashylyǵyn damytýǵa baǵyttalǵan «Jaılaý» jeńildetilgen nesıeleý baǵdarlamasy iske qosylyp jatyr. Baǵdarlama aıasynda nesıe jyldyq 6%-ben 10 jyl merzimge beriledi.
Óndiristiń ósýi salanyń turaqty damýyn, sharýashylyqtardyń óndiristik áleýetiniń nyǵaıýyn jáne ishki naryqtyń qajettilikterin qamtamasyz etýge jetkilikti resýrstardyń bar ekenin kórsetedi.
— Sáýir–mamyr aılarynda baıqalǵan qoı eti baǵasynyń ósýine kelsek, bul ýaqytsha ári maýsymdyq sıpatta boldy. Baǵanyń kóterilýine negizgi sebep — bıyl mamyr aıynyń sońyna sáıkes kelgen Qurban aıt merekesine daıyndyq jáne ony ótkizý kezeńinde suranystyń dástúrli túrde artýy. Qazir Ulttyq statıstıka bıýrosynyń derekterine sáıkes, el boıynsha qoı etiniń ortasha baǵasy kelisine 4 209 teńge. Qoı etiniń satyp alý baǵasy shamamen kelisine 200 teńgege tómendegeni tirkelip otyr. Osylaısha, baıqalǵan baǵa ósimi ónim tapshylyǵymen baılanysty emes. Qazirgi óndiristik kórsetkishter salanyń turaqty damyp kele jatqanyn jáne ishki naryqtaǵy usynys kóleminiń jetkilikti ekenin rastaıdy, — delingen mınıstrlik habarlamasynda.
Aıta ketelik Ortalyq Azııa elderinde qoı baǵasy qansha ekenin jazǵan edik.
