Et eksportyna engizilgen shekteý qashan alynady – Bektenov jaýaby
ASTANA. KAZINFORM – Et eksporttaýshylarǵa eksporttalatyn ónim kóleminiń keminde 15 paıyzyn ishki naryqqa jetkizý mindettemesi engizilmek. Bul jaıynda Májilis depýtattarynyń saýalyna Premer-mınıstr Oljas Bektenovtiń jaýabynda aıtylǵan.
- Sıyr etiniń jappaı áketilýin toqtatý jáne ishki naryqta baǵany turaqtandyrý maqsatynda 2025 jyly Syrtqy saýda saıasaty jáne halyqaralyq ekonomıkalyq uıymdarǵa qatysý máseleleri jónindegi vedomstvoaralyq komıssııanyń sheshimimen iri qara mal etin elimizdiń aýmaǵynan úshinshi elderge jáne Eýrazııalyq ekonomıkalyq odaq elderine áketýge 20 myń tonna kóleminde sandyq shekteý (kvotalar) engizý maquldandy. VAK-tyń sheshimine sáıkes, eldiń azyq-túlik qaýipsizdigin qamtamasyz etý, mal sharýashylyǵy ónimderin óńdeýdi damytý, ishki naryqta et tapshylyǵynyń aldyn alý, sondaı-aq sıyr etiniń baǵasyn turaqtandyrý maqsatynda 2025 jylǵy 31 jeltoqsannan bastap 2026 jylǵy 30 maýsymǵa deıin iri qara mal etin áketýge sandyq shekteý (kvotalar) engizildi, - dedi Oljas Bektenov.
Sonymen qatar Úkimet basshysy et eksportyn ulǵaıtý úshin kvotalaý tetigin túzetý arqyly eksporttaýshylar tizbesin keńeıtý máselesi pysyqtalyp jatqanyn aıtady.
- 2027 jyldan bastap kredıttik quraldardy engizý áserin, mal basyn kóbeıtý men bordaqylaý tsıkldaryn, sondaı-aq ishki naryqtyń et ónimderimen qanyǵýyn eskere otyryp, eksportqa qatysty shekteý sharalaryn birtindep alyp tastaý kózdelip otyr. Bul rette ishki naryqty basym tártippen qamtamasyz etý maqsatynda et eksporttaýshylar úshin eksporttalatyn kólemniń keminde 15 paıyzyn ishki naryqqa jetkizý jónindegi qarsy mindettemelerdi engizý kózdeledi. Atalǵan tásil ishki suranysty qamtamasyz etýge basymdyq berip, eksporttyq jetkizilimderdi júıeli túrde arttyrýǵa múmkindik beredi, - dedi Premer-mınıstr.
Buǵan deıin et eksportyna shekteý Túrkistan oblysynda narazylyq týǵyzǵanyn jazǵan edik.