Et baǵasyn turaqtandyrý boıynsha úshjaqty memorandýmǵa qol qoıyldy
ASTANA. KAZINFORM – 15 sáýirde Saýda jáne ıntegratsııa mınıstrligi Aýyl sharýashylyǵy mınıstrligimen jáne Qazaqstannyń Mal sharýashylyǵy odaǵymen birlesip, sıyr eti baǵasyn turaqtandyrý jónindegi sharalardy iske asyrýǵa baǵyttalǵan yntymaqtastyq týraly memorandýmǵa qol qoıdy.
Memorandýmnyń negizgi maqsaty – taraptardyń ishki naryqtaǵy baǵa turaqtylyǵyn qamtamasyz etý, áleýmettik shıelenistiń aldyn alý jáne bıznestiń áleýmettik jaýapkershiligin arttyrý.
Kelisilgen memorandým aıasynda Qazaqstannyń Mal sharýashylyǵy odaǵy mynadaı mindettemelerdi ózine aldy:
– ishki naryqty et ónimderimen basym túrde qamtamasyz etýdi jáne tapshylyqtyń týyndaýyna jol bermeýdi;
– sıyr etiniń eksporttyq kóleminiń keminde 15%-yn saýda jelileri arqyly ishki naryqqa jetkizýdi uıymdastyrýdy;
– resmı statıstıkalyq derekterge sáıkes aıqyndalatyn ortasha respýblıkalyq baǵadan aspaıtyn óndirýshilerdiń belgilengen ótkizý baǵasy boıynsha ishki naryqqa sıyr etin jetkizýdi qamtamasyz etý;
– et ónimderin ishki naryqqa jetkizý boıynsha akkredıttelgen eksporttaýshylardyń qyzmetin úılestirýdi.
Óz kezeginde Qazaqstan Respýblıkasynyń Aýyl sharýashylyǵy mınıstrligi osy memorandým sheńberinde salalyq usynystardy memlekettik saıasatty qalyptastyrý kezinde qarastyrady, sondaı-aq ishki naryq tolyq qamtamasyz etilgen jaǵdaıda belgilengen tártippen eksporttyq kvotalardy arttyrý múmkindigin qarastyrady.
Saýda jáne ıntegratsııa mınıstrligi ishki naryqtaǵy baǵa monıtorıngin qamtamasyz etedi, saýda jelilerimen ózara is-qımyldy úılestiredi jáne óndirýshiler men saýda obektileri arasynda tikeleı jetkizý sharttaryn jasasýǵa yqpal etedi, sondaı-aq saýda ústemesiniń ruqsat etilgen deńgeıiniń saqtalýyn baqylaıdy.
Memorandým ashyq ári boljamdy naryq qalyptastyrýǵa, baǵa qubylmalylyǵyn tómendetýge jáne halyqty qoljetimdi et ónimderimen qamtamasyz etýge baǵyttalǵan.
Qol jetkizilgen ýaǵdalastyqtardy iske asyrý salanyń eksporttyq áleýetin damytý men ishki naryqty qamtamasyz etý arasyndaǵy tepe-teńdikti saqtaýǵa múmkindik beredi.
Osyǵan deıin BAÁ men Úndistan elimizden halal et ónimderin alǵysy keletinin jazǵanbyz.
