Et baǵasy 2800 teńgeden bastap: Astanada jármeńke 5 kúnge uzartyldy

ASTANA. KAZINFORM – Astanada ár senbi-jeksenbi kúnderi ótetin «Soǵym Fest» et jármeńkesi 27 jeltoqsannan 31 jeltoqsanǵa deıin 5 kúnge uzartyldy. Bul týraly Saýda jáne ıntegratsııa mınıstrliginiń baspasóz qyzmeti habarlady. 

Elordalyqtar et jármeńkesinen jańa jyldyq ústelge eń arzan et ónimderimen qosa aýylsharýashylyq ónimderin de satyp ala alady. 

Jármeńkege Aqmola, Túrkistan, Pavlodar, Abaı jáne Qaraǵandy oblysynyń sharýalary et ónimderin tikeleı jetkizedi. Sáıkesinshe baǵa ádáýir tómen bolady.

Máselen jylqy eti kelisine 2800 teńgeden, sıyr eti 3000 teńgeden bastap, qoı eti 3000-3200 teńge aralyǵynda, qazdyń eti kelisine 2500 teńgeden bastap saýdalanady.

Et jármeńkesi Alash tas joly, 35B mekenjaıyndaǵy «Keryen Joly» saýda ortalyǵynyń avtoturaǵynda ótedi. 

Sonymen qatar atalǵan saýda ortalyǵynda osy kúnderi qalalyq aýyl sharýashylyǵy jármeńkesi de ótedi. Munda jergilikti fermerler men Qazaqstannyń túrli óńirlerinen kelgen óndirýshilerdiń ónimderi usynylady. Qala turǵyndary men qonaqtary kókónister men jemis-jıdekterdi, un jáne sút ónimderin, nan-toqash pen kondıterlik ónimderdi, tabıǵı shyryndar, tosaptar men djemderdi tıimdi baǵada satyp ala alady. Aıta ketý kerek, kartop, pııaz, sábiz jáne jemis-jıdekter osy bazarda eń tómen baǵada satylady.

Jármeńke tańǵy 10:00-den 19:00-ge deıin jumys isteıdi.