«ESJ» taýar bırjasynda astyq baǵasynyń óskeni baıqaldy
ALMATY. Aqpannyń 11-i. QazAqparat /Erbol Azanbek / - «Eýrazııa saýda júıesi» (ESJ) taýar bırjasynda búgin ótken astyq saýdasy boıynsha 3-shi synypty astyqtyń fıýcherstik kelisimsharttarynyń baǵasy 15 paıyzǵa, al 4 synypty astyq úshin 8 paıyzǵa ósti,
dep habarlaıdy QazAqparat ESJ baspasóz qyzmetine silteme jasap.
Kúndizgi sessııa barysynda 3 synypty astyq fıýchersteri úshin ótken saýda barysynda 12 149 800 teńgelik 12 fıýcherstik kelisimshart satylǵan. Onyń 4-i aqpan, 4-i naýryz, 4-i sáýir aıynda oryndalady. 3 synypty astyq úshin aqpan aıyndaǵy fıýchers baǵasy bıylǵy jylǵy alǵashqy saýda kúnimen salystyrǵanda 720 teńgege ósip, ortasha baǵasy tonnasyna 15 500 teńgeni qurady. Naýryz aıyndaǵy 3 synypty astyq baǵasy da 720 teńge kóleminde ósip, sessııanyń jabylýy kezinde tonnasyna 15 560 teńge boldy. Sáýir aıyndaǵy kotırovkalardyń 3 synypty astyq úshin baǵasynda da 720 teńge ósim bolyp, sessııanyń jabylýy kezinde tonnasyna 15 670 teńge boldy. Al 4-shi synypty astyq úshin 10-y - aqpan aıynda, 4-i - naýryz aıynda, 4-i - sáýir aıynda oryndalatyn 14 781 000 teńgelik 18 fıýcherstik kelisim satyldy. Bunda aqpan aıyndaǵy astyq baǵasy 500 teńgege ósip, sessııanyń jabylýy kezinde tonnasyna 12 800 teńgeni qurady. Naýryz aıyndaǵy fıýcherster baǵasy tonnasyna 12 300, sáýir aıynda oryndalatn fıýchers baǵasy 12 350 teńgeni qurady. Kúndizgi sessııanyń jalpy aınalymy 26 930 000 teńgeni qurady.
