Estý qabiletindegi aqaýdy erte anyqtaıtyn elimizdegi alǵashqy ortalyq ashyldy
ASTANA.KAZINFORM – Almaty qalasyndaǵy №5 qalalyq klınıkalyq aýrýhanada Qazaqstandaǵy alǵashqy aýdıologııalyq skrınıngti súıemeldeý boıynsha trekıng-ortalyq ashylyp, estý qabileti buzylǵan patsıentterdiń biryńǵaı tirkelimin engizýge bastaý berildi.
QR Densaýlyq saqtaý mınıstrligi baspasóz qyzmetiniń habarlaýynsha, bul jobalar Sýrdologııa boıynsha quzyret ortalyǵynyń bazasynda júzege asyrylý ústinde. Júıe «Men estımin» pılottyq jobasy sheńberinde sátti synaqtan ótti. Joba Almatynyń úsh perzenthanasyn, úsh medıtsınalyq-sanıtarııalyq alǵashqy kómek uıymyn jáne eki sýrdologııalyq kabınetin qamtydy. Alynǵan nátıjeler jobanyń tıimdiligin jáne ony keń kólemde engizýdiń qajettiligin dáleldedi.
-Trekıng-ortalyqtyń ashylýymen biz kezeń-kezeńimen Almatydaǵy barlyq perzenthanalar men medıtsınalyq-sanıtarııalyq alǵashqy kómek uıymdaryn osy júıege qosamyz. Bul estý qabiletiniń buzylýyn erte anyqtaý jáne balalardy súıemeldeýdiń biryńǵaı baǵytyn qalyptastyrýǵa múmkindik beredi, – dedi ortalyqtyń ashylýynda Almaty qalasy Densaýlyq saqtaý basqarmasynyń basshysy Marat Pashımov.
«Men estımin» jobasy balany aýdıologııalyq skrınıngten bastap dıagnostıka, emdeý, estý apparattarymen qamtamasyz etý jáne ońaltýǵa deıingi barlyq kezeńde súıemeldeýdi qamtamasyz etedi. Jobanyń negizgi býyny – trekıng-ortalyq. Ol naqty ýaqyt rejıminde skrınıng nátıjelerin alyp, «jasyl dáliz» qaǵıdaty boıynsha tekserýdi uıymdastyrady jáne estý qabileti buzylǵan balalardy úzdiksiz súıemeldeıdi.
Júıeniń tıimdiligi qazirdiń ózinde dáleldendi: 2026 jyldyń basynan beri 11 balanyń tolyq estimeıtini der kezinde anyqtaldy. Olardyń barlyǵyna kohlearlyq ımplantattaý jasalyp, qazirgi ýaqytta ońaltýdan ótip jatyr. Joba tolyq aýqymda iske asyrylǵannan keıin jyl saıyn 90 myńnan astam balany aýdıologııalyq monıtorıngpen qamtý josparlanyp otyr. Bul ómiriniń alǵashqy jylyndaǵy balalarda estý qabiletiniń aýyr buzylystary men tolyq joǵalýyn der kezinde anyqtap, emdeýdi erte bastaýǵa múmkindik beredi. Sonymen qatar estý qabileti buzylǵan patsıentterdiń biryńǵaı tirkelimi engiziledi. Ol balalar men eresekter týraly málimetterdi biriktirip, patsıentterdi dıagnostıkadan bastap emdeý men ońaltýǵa deıin úzdiksiz súıemeldeýdi qamtamasyz etedi ári mamandandyrylǵan kómektiń tıimdiligin arttyrady.
Jyl basynan beri №5 qalalyq klınıkalyq aýrýhananyń Sýrdologııa boıynsha quzyret ortalyǵynyń mamandary MÁMS sheńberinde estý qabiletin jaqsartýǵa baǵyttalǵan 200-den astam operatsııa jasady. Sonymen qatar 400-den astam patsıentke estý apparattarymen qamtamasyz etýge joldama berildi. Búginde ortalyq Qazaqstannyń barlyq óńirinen keletin patsıentterge mamandandyrylǵan kómek kórsetedi, olardyń 58%-yn Almaty qalasynyń turǵyndary quraıdy.
Osyǵan deıin 2026 jyldan bastap estý qabileti buzylǵan balalar apparattarmen tegin qamtylatyny týraly jazdyq.
