Estý qabileti zaqymdalǵan balalarǵa arnalǵan 36 oqýlyq pen oqý-ádistemelik keshen ázirlenedi

ASTANA. KAZINFORM – Estý qabileti zaqymdalǵan balalarǵa arnalǵan 36 oqýlyq pen oqý-ádistemelik keshen ázirlenedi. Bul týraly Májilis depýtattarynyń saýalyna Premer-Mınıstrdiń orynbasary Ermek Kósherbaevtyń jaýabynda aıtylǵan.

- Oqý-aǵartý mınıstrliginiń jumys josparyna sáıkes mektepke deıingi jáne orta bilim berýdiń arnaıy baǵdarlamalaryn kezeń-kezeńimen jańartý jáne estý qabileti zaqymdalǵan balalarǵa arnalǵan oqýlyqtardy ázirleý jumysy júrgizilip jatyr. Qazirgi deıin estý qabileti zaqymdalǵan balalarǵa arnalǵan 25 oqýlyq pen oqý-ádistemelik keshen ázirlendi. 2025–2030 jyldary estý qabileti zaqymdalǵan balalarǵa arnalǵan 36 oqýlyq pen oqý-ádistemelik keshen ázirleý qarastyrylady, - dep atap ótedi Ermek Kósherbaev jaýabynda.

Vıtse-premer dereginshe, 2007 jyly «Úmit» sańyraý múgedekterdi qoldaý ortalyǵy» qoǵamdyq qory Qazaqstannyń sańyraý azamattaryna arnalǵan «Qol qımyl álemi» atty ym-ısharat tiliniń taqyryptyq sózdigin úsh tilde (qazaq, orys, aǵylshyn) ázirledi.

Oqý-aǵartý mınıstrliginiń «Arnaıy jáne ınklıýzıvti bilim berýdi damytýdyń ulttyq ǵylymı-praktıkalyq ortalyǵy» RMM 2020-2021 jyldary «e-Ymdaý» qazaq jáne orys tilderindegi ymdaý tiliniń elektrondyq beıne sózdigin, ony arnaıy mektepterdiń oqý-tárbıe úderisinde qoldanýǵa arnalǵan ádistemelik usynymdardy daıyndady.

- Qazaq álipbıiniń daktıli alǵash ret 1998 jyly shyǵarylǵan jáne Bilim, Mádenıet jáne Densaýlyq saqtaý mınıstrlikteri bekitken estý qabileti zaqymdalǵan balalar mektepteriniń daıyndyq synyptaryna arnalǵan «Álippe» oqýlyǵynda qoldanylǵan. Qazirgi ýaqytta daktıl alfavıtin oqytý mektepke deıingi tárbıe men oqytýdyń, bastaýysh bilim berýdiń úlgilik oqý baǵdarlamalarymen «Álippe», «Ana tili» pánderi aıasynda kózdelgen, - dedi ol.

Qazaq ym-ıshara tili men daktıl álipbıin qabyldaý máselesi pysyqtalatynyn jazǵan edik.