Estý qabileti buzylǵan qyzdy zorlaǵan Shymkent turǵyny 8 jylǵa sottaldy

ShYMKENT. KAZINFORM-Shymkent qalasynyń qylmystyq ister jónindegi aýdanaralyq sotynda estý qabileti buzylǵan qyzdy óltiremin dep qorqytyp, zorlaǵan 28 jastaǵy er adamǵa qatysty sot úkimi shyqty.

Qoǵamda keń rezonans týdyrǵan qylmystyq is jábirlenýshiniń quqyqtary men múddelerin qorǵaý, sondaı-aq qylmystyń sıpatyn eskere otyryp, jabyq sot otyrysynda qaraldy.

Sottalýshynyń áreketi Qylmystyq kodekstiń 120-baby 2-bóliginiń 2-tarmaǵyna sáıkes — adam óltiremin dep qorqytý arqyly jasalǵan zorlaý retinde saralandy.

Sottyń habarlaýynsha, aıyptalýshynyń kinási qylmystyq is aıasynda jınalǵan dáleldemelerdiń jıyntyǵymen tolyq dáleldendi. Іs júrgizý barysynda aıyptalýshy óz kinásin tolyq moıyndap, jasaǵan isine ókinish bildirdi. Sot bul jaıtty jeńildetetin mán-jaı retinde qarastyrdy, al aýyrlatatyn mán-jaılar anyqtalǵan joq.

Barlyq mán-jaıdy eskere otyryp, sot aıyptalýshyǵa 8 jyl bas bostandyǵynan aıyrý jazasyn taǵaıyndady. Sondaı-aq jábirlenýshiniń azamattyq talaby qanaǵattandyryldy. Sottalǵan adam moraldyq zııan retinde 3 mıllıon teńge kóleminde ótemaqy tóleýge mindetteldi.
Úkim áli zańdy kúshine engen joq.

Aıta keteıik, budan buryn Túrkistanda jasóspirimder balalar oıyn alańyn qıratqanyn jazǵan bolatynbyz.