Estý qabileti buzylǵan 150 bala estý jáne sóıleý qabiletin saýyqtyrý kýrsynan ótti
ASTANA. KAZINFORM – Eńbek jáne halyqty áleýmettik qorǵaý mınıstrliginiń áleýmettik qorǵaý salasyn damytýdyń Ulttyq ǵylymı ortalyǵynyń mamandary estý qabileti buzylǵan balalarǵa táýlik boıy baqylaý jaǵdaıynda estý-sóıleý ońaltý kýrsyn sátti ótkizdi.
Ulttyq ǵylymı ortalyǵy (budan ári – UǴO) múgedektigi bar adamdarǵa arnalǵan ózekti áleýmettik ońaltý baǵdarlamalaryn ázirleýmen aınalysady. 2007 jyldan bastap Qazaqstanda kohlearlyq ımplantatsııa boıynsha otalar jasala bastaǵannan beri ortalyq mamandary medıtsına, sýrdopedagogıka jáne áleýmettik ońaltý salalaryndaǵy bilim men ádister toǵysynda ázirlengen kohlearlyq ımplant qoıylǵan patsıentterge arnalǵan biregeı estý-sóıleý beıimdelý Baǵdarlamasyn jasap shyǵardy.
Dástúr boıynsha kóktem-jaz mezgilinde jylyna bir ret qarqyndy ońaltý kýrsy ótkiziledi. Bıyl bul kýrs 1 sáýir men 20 tamyz aralyǵynda Almaty qalasyndaǵy «Altyn Qarǵaly» shıpajaıy bazasynda ótti. Barlyq óńirden kelgen 150 bala keshendi kómek aldy. Ár balaǵa jáne ony ertip kelgen ata-anasyna turý orny, tórt mezgil tamaqtaný jáne jol aqysynyń ótemaqysy qamtamasyz etildi.
Balalarmen UǴO-nyń joǵary bilikti mamandarynan quralǵan mýltıdıstsıplınarly komanda jumys istedi. Olardyń qatarynda sýrdopedagog, logoped, psıholog, otorınolarıngolog, sýrdolog jáne nevropatologtar boldy. Ár balaǵa aldyn ala dıagnostıka negizinde jeke damý baǵdarlamasy ázirlenip, kohlearlyq ımplanttyń sóıleý protsessoryn baptaýdy jáne kúndelikti túzetý sabaqtaryn qamtydy.
Ońaltý úderisine ata-analardy tartýǵa erekshe mán berildi. Olar úshin «Ata-analar mektebi» uıymdastyrylyp, keńes berilip, úı jaǵdaıynda balalarmen jumys isteý ádistemeleri úıretildi.
Ońaltý baǵdarlamasyna mýzykalyq-yrǵaqty sabaqtar, fonetıkalyq rıtmıka jáne áleýmettik-mádenı sharalar, sonyń ishinde haıýanattar baǵyna, tsırkke jáne «Kók-Tóbe» saıabaǵyna barý sekildi is-sharalar engizildi. Bul balalardyń áleýmettik beıimdelýine yqpal etti. Sabaqtar memlekettik tilde jáne orys tilinde júrgizildi.
Jyl saıynǵy estý-sóıleý ońaltý kýrsyna qabyldaý oblystar men respýblıkalyq mańyzy bar qalalardyń jumyspen qamtýdy úılestirý jáne áleýmettik baǵdarlamalar basqarmalary arqyly júzege asyrylady. Baǵdarlama shartyna sáıkes, balalarǵa kohlearlyq ımplantatsııadan keıingi 5 jyl ishinde ońaltý sharalaryna qatysý múmkindigi beriledi.
Aıta ketý kerek, jyl saıynǵy táýlik boıy baqylaý jaǵdaıyndaǵy kýrstan bólek, UǴO-nyń óńirlik fılıaldarynda jyl boıy kúndizgi estý-sóıleý ońaltý jumystary júrgiziledi. Bul estý qabileti buzylǵan balalardy úzdiksiz qoldaýdy qamtamasyz etedi.
Buǵan deıin estý qabileti zaqymdalǵan balalarǵa arnalǵan 36 oqýlyq pen oqý-ádistemelik keshen ázirlenetinin jazǵan edik.