Estý qabiletinen aırylǵan astanalyq shahmatshy Eýropa chempıonatynyń qola júldegeri atandy
NUR-SULTAN. QazAqparat - Shahmattan Eýropa chempıonaty Ýkraınanyń Lvov qalasynda ótti, dep habarlaıdy QazAqparat tilshisi.
15-21 shilde kúnderi ótken Eýropa chempıonatyna 20 elden 200-ge jýyq estý qabiletinen aırylǵan shahmatshy qatysty. Onyń ishinde Belarýs, Horvatııa, Chehııa, Estonııa, Anglııa, Germanııa, Gollandııa, Izraıl, Qazaqstan, Latvııa, Lıtva, Moldova, Rýmynııa, Portýgalııa, Polsha, Serbııa, Slovenıa, Slovakııa, Shvetsııa, Shveıtsarııa elderi bar.
«Nur-Sultan qalasyndaǵy múgedek jandarǵa arnalǵan sport mektebiniń túlegi Álııa Muratova shahmattan Eýropa chempıonatynda qola júldege ıe boldy. Álııa sport sheberine kandıdat, bıyl ótken shahmattan Qazaqstan chempıonatynyń kúmis júldegeri. Sońǵy 4-5 jyl boıy respýblıkalyq jáne halyqaralyq túrli deńgeıdegi jarystardyń jeńimpazy. Álııany 7 jyl boıy elimizge tanymal shahmat jattyqtyrýshysy Saǵymbaı Dáýrenbekov tárbıelep keledi. Taǵy bir aıtyp ótetin jaıt, Eýropa chempıonaty álem chempıonatyna joldama alyp, onda nátıjeli oıyn kórsetýge tikeleı yqpal etedi», - dedi elordalyq múgedek jandarǵa arnalǵan sport mektebiniń baspasóz hatshysy Karına Dúısenova.
Elordalyq sport mektebi ókiliniń sózine sensek, Á. Muratova ústimizdegi jyldyń jeltoqsan aıynda Italııada ótetin halyqaralyq qysqy sýrdlımpıada oıyndarynda elimizdiń namysyn qorǵaıtyn bolady.
