Estý qabileti nashar jandar úshin Daktıl álipbıiniń qazaqsha nusqasy bekitilýi múmkin
«Halyqtyń az qamtylǵan bóligi, onyń ishinde erekshe qajettiligi bar adamdarǵa qatysty ómirdiń ózi birqatar máselelerdiń baryn kórsetip berip otyr. Múmkindigi shekteýli adamdar úshin sapaly bilimge qol jetkizý óte qıyn. Tipti keıbir jerde múlde joq. Qazirgi ýaqytta bilimge degen erekshe qajettiligi bar balalardyń sany 147 myńǵa jetip otyr. Olardyń ishinde estý men kórý qabileti nashar balalardyń sany 13 myńǵa jýyq. Júrgizilgen zertteý jumystary kórsetip otyrǵandaı, qulaǵynda múkistigi bar balalardyń 70 paıyzynyń ata-analary saý. Sondyqtan, keleshekte ondaı qatardaǵy jetkinshekterdiń sany qansha bolatynyn boljap bilý múmkin emes», - deıdi senator.
Áıtimovanyń aıtýynsha, erekshe qajettiligi bar adamdardy sapaly bilimmen qamtamasyz etý jolynda jasalyp jatqan sharýalar jetkiliksiz dep aıtýǵa bolady.
«Sonymen birge, kórý qabileti nashar balalardyń da jaǵdaıy máz emes. Mundaı balalardyń mańdaıy tireletin máselelerdiń bárin tizip shyqpaı-aq qoıaıyn. Biraq, birqataryn aıtyp ótsem: bul - estý men kórý qabileti nashar balalarǵa arnalǵan ádebı kitaptardyń azdyǵy. Osyndaı balalardyń ózara qarym-qatynas jasaýyna jol ashyp beretin mamandandyrylǵan klýbtardyń bolmaýy. Sýrdoaýdarmashylar men ol kadrlardyń qajettiligin bilip otyratyn taldaý jumysynyń joqtyǵy», - deıdi ol.
Senatordyń sózine qulaq assaq, estý patologııasy bar balalar úshin qymbat hırýrgııalyq otany jasaýǵa qol jetkizilgenimen, ońaltý ortalyqtary joq. Sondyqtan, ota sátti jasalsa da, ońaltý bolmaǵannan keıin bala qaıtadan bastapqy kúıge túsýi múmkin.
«Memlekettik tilde arnaıy ádebıetterdi oqytatyn oqý baǵdarlamasy, qazaq tilindegi Daktıl álipbıiniń bekitilgen nusqasy joq. Osy máselelerdi sheshý úshin bizdiń oıymyzsha, birqatar sharalardy qolǵa alý kerek. Solardyń birnesheýin atap óteıin. Ym tiliniń qazaq tilindegi Daktıl álipbıin bekitýdi, múmkindigi shekteýli balalarǵa qarapaıym balabaqsha men mektepterge baryp turý múmkindigine jol ashýdy, estý qabileti nashar balalardy bilim deńgeıin alýǵa múmkindik berýdi, JOO-larda ym tilin meńgerýdiń tájirıbelik pánin engizýdi usynamyz. Sonymen birge, estý qabileti nashar adamdar meńgere alatyn mamandyqtardyń tizimin bekitýdiń mańyzy zor», - dep túıdi senator.
