Estrada juldyzdarynyń qatysýymen «Dala daýysy» ІІІ halyqaralyq radıofestıvaliniń Gala-kontserti ótedi
ASTANA. QazAqparat - 28 qarashada «Qazmedıa ortalyq kıno-kontsert zalynda» «Dala daýysy» ІІІ halyqaralyq radıofestıvaliniń jeńimpazdaryn saltannatty marapattaý rásimi men Gala-kontsert ótedi, dep habarlaıdy «Qazaqstan» RTRK baspasóz qyzmetinen.
«Dala daýysy» - mýzyka arqyly qazaq tilin dúnıejúzi elderi arasynda nasıhattaıtyn Qazaqstandaǵy birinshi radıofestıval. Festıvalǵa qatysýshy shet eldik úmitkerge qazaq ánin oryndaý nemese óz halqynyń ánin qazaq tilinde oryndaý talaby qoıylǵan. Ondaǵy maqsat - qazaq ánin shet eldikterge oryndatý arqyly ulttyq mýzykalyq jáne poetıkalyq tildi nasıhattaý.
Radıofestıvaldiń negizgi maqsaty - qazaq ániniń zamanýı básekege qabiletti tóltýmalyq dybysyn nasıhattaý, jyldyń úzdik ánderin anyqtaý jáne jańa talanttardy tabý bolyp tabylady.
«Dala daýysy» - tek qana radıofestıval emes, bedeldi mýzykalyq sherý. Qazaq radıosynyń mıllıondaǵan tyńdarmandary ınternet arqyly súıikti ánderine daýys berip, jeńimpazdardy anyqtady. 2012 jylǵy birinshi "Dala daýysyna" eki myńdaı adam saıt arqyly daýys berse, 2013 jyly 54 memleketten mıllıonǵa jýyq tyńdarman daýys bergen. Ótken 2 jylda halyqaralyq "Dala daýysy" radıofestıvaline Qazaqstan, Túrkııa, Qytaı, Mońǵolııa, Reseı, Qyrǵyzstannan 200-den astam ánshi qatysyp, laýret atandy.
Bıylǵy "Dala daýysyna" qatysýǵa nıet bildirgen oryndaýshylardyń qatarynda: Reseı, Qytaı, Armenııa, Latvııa, Belarýs, Qyrǵyzstan memleketterimen qatar, otandyq juldyzdardan: Marjan Arapbaeva, Qaırat Baekenov, Qurmash Mahanov, Shahırızat Seıdahmet, Álı Oqapov, Nurǵalı Turlybekov, Gúlmars Amanbaeva, Ardaq Isataeva jáne "Format" pen "Zaman" toptary syndy úmitkerler jáne siz estimegen jańa daýystar bar. Jobaǵa qatysýǵa nıet bildirgen 100 oryndaýshydan 20 ánshi ǵana "Dala daýysy" ІІІ Halyqaralyq radıofestıvaliniń laýreaty atanbaq.
Radıofestıval jeńimpazdary «Dástúrli oryndaýshy», «Akademııalyq oryndaýshy», «Estradalyq oryndaýshy» atalymdary boıynsha marapattalyp, festıvaldiń «Jańa esimderi» anyqtalyp, olarǵa «Dala daýysynyń» arnaıy statýetkasy men arnaıy dıplomyn elimizdiń óner jáne mádenıet, qoǵam qaıratkerleri tabystaıdy.
