Estrada juldyzdaryn jınaǵan Ertis Promenade 2 qyrkúıekte jabylady
PAVLODAR. QazAqparat - Pavlodar qalasynda jaz boıy Ertis Promenade sahnasynda ótken kontsertter men festıvalderdiń qorytyndy, saltanatty jabylaýy 2 qyrkúıek kúni saǵat 19.00-de ótedi, dep habarlaıdy pavlodarnews.kz.
Іshki saıasat basqarmasynyń málimetinshe, bul kúni Ertis Promenade sahnasynda Astana qalasynan ártister óner kórsetedi. Olardyń arasynda «Saryarqa» halyq ánderi ansambli, «Shalqyma» halyq bı ansambli, estradalyq bı ansambli, klassıkalyq jáne estradalyq vokal oryndaýshylary bar. Saǵat 20.00-de sahna tórine qazaqstandyq juldyzdar Marjan Arapbaeva, Almas Kishkenbaev, Klara Túlenbaeva, Kýláıim Qaıyrbaeva, Dos, Rınat Maltsagov shyǵady. Ádettegideı, kontsertti tamashalaý - tegin.
Aıta ketý kerek, ár demalys kúnderi pavlodarlyq jaǵalaý myńdaǵan turǵyndar men qala qonaqtaryn jınap otyrdy. - Keıbir kontsertterge 50 myń halyq jınalǵan, - dedi Pavlodar oblysy ishki saıasat basqarmasynyń basshysy Ernur Dáýenov. - Al ortasha eseppen ár kontsertke bes myńǵa jýyq halyq kelip otyrǵan. Jazǵy ýaqyt ishinde Ertis Promenade-ta ótken sharaǵa árbir ekinshi pavlodarlyq qatysqan. Sonymen qatar, kontsertterge oblys aýmaǵynan jáne Qazaqstannyń basqa da óńirlerinen qonaqtar kelip otyrdy. Sondaı-aq, Reseı Federatsııasy men ózge shetel memleketterinen meımandar bolǵan. Meniń oıymsha, Ertis Promenade bul - Pavlodar oblysynyń jańa brendy bolyp qaldy. Biz kelesi jyly da osyndaı iri jobalardy iske asyrýdy josparlap otyrmyz. Eske sala keteıik, osy jazda Ertis Promenade sahnasynda jerlesterimiz Merýert Túsipbaeva, Rınat Maltsagov, Roza Muqataeva, Janar Duǵalova, Serik Musalimov, «Bastaý» dýety jáne Derık Baınazarov án aıtty. Sonymen qatar, Qaırat Nurtas, Nurlan Abdýllın, Álı Oqapov, Ernar Aıdar, Beıbit Qorǵan, Álisher Kárimov, Erke Esmahan, Luina jáne «Jigitter», «BN», «Muz-Art», Kesh You toby óz ónerlerin kórsetti. Sheteldik juldyzdardyń arasynda Pavlodarǵa «Belyı Orel» toby men Dıma Bılan jáne La Bouche - Onita Boone ı Willi V tobynyń burynǵy oryndaýshylary keldi.
