Estrada juldyzdary jappaı HQO-ǵa jumysqa «turyp jatyr»
Azamattarǵa arnalǵan úkimet búgin elimiz boıynsha atap aıtqanda Astana, Almaty qalalary jáne Aqmola, Almaty oblystarynda «Óner juldyzdarynyń HQKO-daǵy bir kúni» atty aktsııasyn ótkizdi.
«Aktsııanyń maqsaty sharaǵa tanymal tulǵalardy qatystyra otyryp, HQKO qyzmetkerleriniń jumysynyń erekshelikterin tanytý. Sebebi HQKO-na azamattar qandaıda bir qujattardy retteý úshin keledi. Al ol qujattardy retteý barysynda túrli kedergiler men túsinispeýshilikter týyndaıdy. Sol kezde aldymen halyqpen baılanysqa túsip, azamattarmen til tabysa bilý, týyndaǵan problemany daý-damaısyz sheshý mańyzdy. Bul isti bilikti mamandar ǵana júzege asyra alady. Aktsııany uıymdastyrýdaǵy maqsat ta HQKO qyzmetkeleriniń biliktiligin tanytý», -dedi «Azamattarǵa arnalǵan úkimet» memlekettik korporatsııasynyń qoǵammen baılanys departamentiniń dırektory Murat Jumanbaı.
Sonymen qatar departament dırektory ústimizdegi jyldyń jeti aıy boıynsha azamattarǵa arnalǵan úkimet korporatsııasy arqyly 27 mln-nan astam qyzmet kórsetilgenin tilge tıek etti.
Aktsııa barysynda óner juldyzdary ortalyqtyń qyzmetkeri retinde tolyq jumys istedi, ıaǵnı qujattardy tirkeý, turǵylyqty meken-jaı anyqtamasyn berý, avtokólikterdiń aıyppulyn tóleý taǵy basqa qyzmetterdi júzege asyrdy.
«Búgingi sharada HQKO qyzmetkeri bola otyryp túsingenim, bul jumys ońaı emes. Sebebi, ár adam túrli qujattarmen, túrli suraqtar boıynsha keledi, al sen suraqtarǵa dereý ári durys jaýap berýiń kerek. Óz basym HQKO-nyń qyzmetkerine kerekti eki qasıetti uqtym, ol kishipeıil bolý, sosyn sabyrly bolý, ásirese tózimdilik aýadaı qajet»,- dep óz oıymen bólisti belgili ánshi Qydyráli Bolman.
Halyqqa qyzmet kórsetý aktsııasyna Qydyráli Bolman, Qurmash Mahanov, Aıjan Nurmaǵanbetova, Shaharızat Seıdahmet sekildi taǵy basqa belgili ánshiler qatysty.