Estrada juldyzdary Jańa jyl túni ashyq aspan astynda óner kórsetedi
ASTANA. QazAqparat - 31 jeltoqsan kúni saǵat 21:00-den 03:00-ge deıin «Han Shatyr» saýda, oıyn-saýyq ortalyǵy janyndaǵy muz qalashyqta qazaqstandyq estrada juldyzdarynyń qatysýymen shoý-baǵdarlama men kontsert ótedi.
Bul týraly QazAqparat Astana qalasy ákimdiginiń baspasóz qyzmetine silteme jasap habarlaıdy.
Elordada jańa jyl túni Aıqyn Tólepbergen, Álı Oqapov, Marjan Arapbaeva, aǵaıyndy Júginisovter, «Orda» toby, «Dabyl» toby jáne taǵy da basqa ártister óner kórsetedi.
Elimizdiń bas shyrshasynyń janynda ashylǵan muz qalashyǵynda kelýshilerdi kóp qyzyq kútedi. Sonymen qatar, jańa jyl túni merekelik otshashý uıymdastyrylady. 2017 jyly otshashý elordanyń úsh aýdanynda - «Han Shatyr» SOSO janynda, Esil ózeniniń jaǵalaýynda, sondaı-aq Abylaı han dańǵyly men A.Pýshkın kóshesiniń qıylysyndaǵy saıabaǵynda bolady», - delingen habarlamada.
Sonymen qatar konkı tebýdi unatatyn jandar úshin jaǵalaýdaǵy jańa jyl túni erekshe bolmaq. Munda qala turǵyndary úshin jappaı konkı tebý uıymdastyrylady.
