Estrada jáne kıno juldyzdary Ulttyq mýzeıde gıd boldy
ASTANA. QazAqparat - Astanadaǵy QR Ulttyq mýzeıinde Dúnıejúzilik ekskýrsııa júrgizýshileri kúnine oraı «Juldyzdy gıd» shoý-jobasy ótti, dep habarlaıdy QazAqparat Mádenıet jáne sport mınıstrligine silteme jasap.
«Juldyzdy gıd» jobasyna QR eńbek sińirgen qaıratkerleri - Aıgúl Imanbaeva, Aıgúl Qosanova, Ardaq Balajanova, Jeńis Ysqaqova, ánshi Dos, teatr jáne kıno ártisteri - Dáýren Serǵazın men Nurken Óteýilov qatysty. Olar mýzeıge kelýshilerdi elimizdiń tarıhy, mádenıeti jáne dástúrimen tanystyrdy, al kelýshiler tanymal óner qaıratkerlerin jańa qyrynan tanýǵa múmkindik aldy.
«Juldyzdy gıd» 21 aqpanda atalyp ótiletin Dúnıejúzilik ekskýrsııa júrgizýshileri kúnine oraılastyrylǵan. Ózderiniń kásiptik merekesin alǵash ret 1990 jyly London qalasynyń gıdtary atap ótken bolatyn.
Joba bıyl Ulttyq mýzeıde úshinshi ret ótkizildi. Oǵan buǵan deıin Altynaı Jorabaeva, Qaraqat Ábildına, Marjan Arapbaeva, Qalqaman Sarın, Ádil Ahmetov qatarly óner maıtalmandary qatysty.
