Estonııany qymbatshylyq qysyp tur

ASTANA. KAZINFORM — Estonııada 2025 jyldyń tamyz aıyndaǵy jyldyq ınflıatsııa deńgeıi 6,2%-ǵa jetti. Bul — Eýropalyq Odaqtaǵy eń joǵary baǵa ósimi. Bul týraly AZÁRTADJ jazdy. 

Bul málimetter Estonııanyń Statıstıka basqarmasynyń aldyn ala baǵalaýynan alynǵan.

Shildemen salystyrǵanda, maýsym aıynda tutyný baǵalary 0,9%-ǵa ósken. Tamyzda baǵanyń ósýi qonaqúı jáne meıramhana qyzmetterinen basqa barlyq negizgi sanattarda baıqalǵan.

Bul jaǵdaı, eń aldymen, Estonııanyń qosylǵan qun salyǵyn (QQS) 22%-dan 24%-ǵa deıin kóterýimen baılanysty. Sonymen qatar, ınflıatsııaǵa áser etetin basqa da faktorlar bar.

Ekonomıst Lenno Ýskıla atap ótkendeı, baǵa ósimi — Estonııa úshin №1 problema bolyp otyr, ásirese ekonomıkalyq ósimniń joqtyǵy aıasynda. Onyń aıtýynsha, ortasha jalaqy 6%-ǵa da jetpeı ósip jatqandyqtan, bul ınflıatsııany jaba almaıdy. Sonyń saldarynan halyqtyń tutynýǵa jáne jınaqtaýǵa jumsaıtyn qarajaty azaıyp otyr.

Sondaı-aq, ınflıatsııa eksporttaýshylardyń shyǵyndaryn arttyryp, estondyq taýarlar men qyzmetterdiń syrtqy naryqtaǵy básekege qabilettiligin tómendetedi, deıdi Ýskıla.

Estonııalyq sarapshylardyń pikirinshe, azyq-túlikke salynatyn salyqty azaıtý máselesi el saıasatkerleriniń kún tártibinde qala berýi tıis.

Aıta keteıik, Estonııa úkimeti qorǵanys shyǵyndaryna jumsalatyn qarjyny ulǵaıtpaq.