Estonııada avtobýs pen júk kóligi soqtyǵysty
NUR-SULTAN. QazAqparat – Beısenbi kúni Lıaene-Harıý bolysynda reıstik avtobýs pen júk kóligi soqtyǵysyp, 26 adam zardap shekti, dep habarlaıdy QazAqparat respýblıkanyń Qutqarý departamentine silteme jasap.
Habarlamaǵa sáıkes, jol-kólik oqıǵasy saǵat 13:10-da Tallın-Rannamyıza-Kloogaranna tas jolynyń 27-shi shaqyrymynda Meremyıza eldi mekeniniń mańynda oryn alǵan. Avtobýs joldyń jıeginde turǵan tirkemeli júk kóligine soǵylǵan.
Jol apatynyń saldarynan eki adam aýyr, al beseýi aýyrlyǵy ortasha jaraqat alǵan. Zardap shekkenderdiń barlyǵy Soltústik-Estonııa óńirlik aýrýhanaǵa jetkizildi. Budan bólek taǵy da 19 adam jeńil túrde jaraqattanǵan.
