Estonııa úkimeti qorǵanys shyǵyndaryna jumsalatyn qarjyny ulǵaıtpaq

ASTANA. KAZINFORM — Estonııa úkimeti 2029 jylǵa deıin qorǵanys shyǵyndaryn JІÓ-niń orta eseppen 5,4%-yna deıin ulǵaıtatyn jańa qorǵanys baǵdarlamasyn bekitti, dep habarlaıdy Euronews.

Baǵdarlamaǵa sáıkes, qorǵanys shyǵyndary 2,8 mıllıard eýroǵa artady. Qazirgi ýaqytta Estonııanyń qorǵanys shyǵyndary JІÓ-niń 3,3%-yn quraıdy.

— Biz Estonııanyń ulttyq qorǵanysy turǵysynan tarıhı sheshim qabyldadyq. Bir jylda ulttyq qorǵanysqa mundaı kólemde qosymsha qarajat eshqashan bólingen emes, — dedi Estonııanyń qorǵanys mınıstri Hanno Pevkýr.

Kelesi jyly qorǵanys shyǵyndary JІÓ-niń shamamen 5,4%-yna jetip, bir jylda 2%-dan asa ósedi jáne uzaq ýaqyt osy deńgeıde saqtalady, dep atap ótti mınıstr.

— Tórt jyldaǵy ortasha kórsetkish te 5,4%-dy quraıdy, bul bizge NATO-da kelisilgen áskerı áleýetti arttyrý maqsattaryna jetýge múmkindik beredi, — dep qosty Pevkýr.

Úkimettiń qorǵanys shyǵyndaryn arttyrý týraly sheshimi áskerı múmkindikterdi edáýir keńeıtedi, atap aıtqanda, áýe qorǵanys júıesin jetildirý, qurlyq áskerleriniń atys qýatyn arttyrý, elektrondy soǵys ádisterin damytý josparda bar.

Buǵan sonymen qatar aýqymdy ınfraqurylymdyq jobalar, kıberqorǵanys, ushqyshsyz ushý apparattary, qarýly kúshterdiń jeke quramyn ulǵaıtý jáne basqa da bastamalar kiredi.

Osydan buryn Latvııa men Estonııa jaıaý áskerge qarsy mınalardy paıdalanýǵa tyıym salatyn Konventsııadan shyǵatyny habarlandy.