Estonııa tájirıbesi: Tallınde tegin qoǵamdyq kólikti qalaı engizdi
ASTANA. QazAqparat - Tallın turǵyndary qoǵamdyq kólikpen tegin qatynaıdy.Atalǵan júıeniń arqasynda jeke kólikpen júretinderiń sany azaıdy, dep habarlaıdy QazAqparat tilshisi.
Tallın qalalyq keńesiniń tóraǵasy Mıheıl Kylvarttyń aıtýynsha, tegin qoǵamdyq kólik júıesi osydan bes jyl tolyǵymen engizildi. Oǵan deıin tek zeınetkerler ǵana aqysyz júrdi. Odan keıin mektep oqýshylary tegin qatynaı bastady.
«Baıqap qarasaq, bıletten túsetin paıda kóp emes. Esesine dotatsııanyń kólemi artyp keledi. Sebebi avtobýspen tegin júrý úshin tirkeýge turý qajet. Al tirkeýge turǵan adam jeke tulǵanyń salyǵyn tóleıdi. Halyq qoǵamdyq kólikpen júremiz dep, jappaı tirkeýge tura bastady. Salyqtyń kólemi artty. Sodan qoǵamdyq kólikti tolyǵymen aqysyz júıege aýystyrýǵa sheshim qabyldadyq», - dedi M.Kylvart QazAqparat tilshisine bergen suhbatynda.
Onyń aıtýynsha, bes jyldyń ishinde atalǵan bastamanyń arqasynda jergilikti bıýdjetke biraz qarjy túsken.
«Qazirgi kezde Tallınniń bıýdjeti 680 mln eýrony qurap otyr. Sonyń 14-15 protsenti qoǵamdyq kólik salasyna bólinedi. Ótken jyly qala turǵyndarynyń 80 protsenti qoǵamdyq kólikti tańdady. Ázirshe, barlyǵy jappaıa vtobýsqa minbese de, biraz adamdar jeke kólikterin tastap, qoǵamdyq kólikpen júredi. Olar aqshaǵa qarap otyrǵan joq. Qoǵamdyq kólikpen júrgen jyldam ári yńǵaıly», - dep atap kórsetti M.Kylvart.
Aıta keteıik, Astanada Jibek joly elderi qala merlarynyń forýmy ótti. Búgin plenarlyq májiliske Sofııa esimdi robot ta qatysty. Ol jasandy ıntellekti bar álemdegi alǵashqy gınoıd bolyp sanalady.
