Estonııa Premer-Mınıstri ALJIR tutqyndarynyń rýhyna taǵzym etti

ASTANA. QazAqparat - ALJIR mýzeı-memorıaldyq kesheninde 1938-1953 jj. lagerde jazasyn ótegen estondyq áıelderge arnalǵan taqta  ashyldy, dep habarlaıdy QazAqparat Astana qalasynyń mádenıet jáne sport basqarmasyna silteme jasap.

Sharaǵa Estonııa Respýblıkasynyń Premer-Mınıstri ıÝrı Ratas, Estonııanyń Qazaqstandaǵy elshiliginiń ókilderi, Astana qalasy mádenıet jáne sport basqarmasy basshysynyń orynbasary Narıma Muhambetalına jáne mýzeı qyzmetkerleri qatysty.

1938-1953 jyldar aralyǵynda ALJIR lagerinde 21 eston áıel jazasyn ótegen, olardyń ekeýi basyna túsken azapqa tóze almady, qaza tapty. Olar qıyndyqtarǵa qaramastan kúıeýlerine taǵylǵan aıypty moıyndaǵan joq, ómirleriniń sońyna deıin olarǵa adal bolyp qaldy, muny erlik deýge bolady.

Estonııa Premer-Mınıstri ıÝrı Ratas adam tózgisiz beınetti basynan ótkergen ALJIR tutqyndary, eston áıelderdiń rýhyna taǵzym etti.

Estelik taqtanyń ashylýy barysynda qonaqtar úshin mýzeı aýmaǵynda ornalasqan ekspozıtsııalar boıynsha ekskýrsııa uıymdastyryldy. Kelýshiler «Alash» jáne «ALJIR» zaldaryn tamashalady. Sapar sońynda Ratas myrza Pikirler kitabynda óz tilegin qaldyryp, 30-50 jj. saıası qýǵyn-súrginde jazyqsyz qurban bolǵandardy este qaldyrýǵa jaǵdaı jasaǵan Qazaqstan basshysy Nursultan Nazarbaevqa alǵysyn bildirdi.

Sheteldik meımanǵa mýzeı tarapynan estelik retinde jappaı saıası qýǵyn-súrginniń 80 jyldyǵyna jáne mýzeıdiń 10 jyldyǵyna oraı shyǵarylǵan repressııaǵa ushyraǵandardyń balalarynyń «Urpaqtar umytpaıdy. Pomnıat potomkı» atty jınaǵy tabystaldy.