Estonııa men Fınlıandııada 70 jastan asqan turǵyndar úlesi eki ese artty
ASTANA. KAZINFORM – Estonııa men Fınlıandııada sońǵy otyz jyl ishinde halyqtyń jalpy quramynda 70 jastan asqan adamdardyń úlesi eki ese kóbeıdi, dep habarlaıdy AZERTADJ.
Sonymen qatar, jumys isteıtin zeınetkerlerdiń sany da artqan. Ǵalymdardyń aıtýynsha, olardyń jumys isteýine qosymsha tabysqa degen qajettilikpen qatar, qoǵamǵa óz úlesin qosýǵa degen ynta da áser etedi.
Fınlıandııadaǵy jaǵdaı
AZƏRTAC habarlaǵandaı, Fınlıandııada bıyl tamyz aıynda 70 jastan asqan adamdardyń sany bir mıllıonnan asty. Fınlıandııa Statıstıka ortalyǵynyń ókili Ioonas Toıvola túsindirgendeı, bul jas sanatyna endi soǵystan keıingi beıbı-bým kezeńinde týǵan urpaq kirdi.
Estonııadaǵy jaǵdaı
Estonııada 70 jastan asqan adamdar sany — 203 myń. Eger Fınlıandııada bul jas toby halyqtyń besten birin qurasa, Estonııada — 15%-dy quraıdy. Tallınn ýnıversıtetiniń demografııa professory Allan Pýýrýdyń aıtýynsha, bul kórsetkishter halyqtyń qartaıýyn jáne Estonııa men Fınlıandııa arasyndaǵy demografııalyq aıyrmashylyqtardy aıqyn kórsetedi.
Jumys isteıtin zeınetkerler
Estonııa statıstıka departamentiniń derekterine sáıkes, byltyr 70-89 jas aralyǵyndaǵy árbir onynshy turǵyn jumys istegen. Bul jalpy sany 18 300 adam. Osy jastaǵy erlerdiń 14%-y, áıelderdiń 8%-y eńbek etken, olardyń jartysynan astamy tolyq emes jumys kúni boıynsha jumys isteıdi.
Derekter sondaı-aq joǵary bilimdi adamdardyń, orta bilimdilerge qaraǵanda, eńbek jolyn uzaq jalǵastyratynyn kórsetedi. Tallınn ýnıversıtetiniń Qoǵamdyq ǵylymdar ınstıtýtynyń aǵa ǵylymı qyzmetkeri Lıılı Abýladzeniń aıtýynsha, qart adamdardyń jumys isteý sebepteri ártúrli.
— Estonııada eń keń taralǵan sebep — qarjylyq qajettilik. Bul Eýropanyń basqa elderimen salystyrǵanda qarttardyń kedeılik qaýpiniń joǵary ekenin rastaıdy. Biraq shamamen sonshalyqty adam jumysty qajet dep sanaıdy nemese eńbekten lázzat alady. Adamdar qoǵamǵa úles qosa alatynyn, ózderin qajet ekenin sezinedi. Sondaı-aq, keıbireýler úshin bul qoǵamnyń bir bóligi bolyp qala berý jáne ózderin belsendi seziný múmkindigi, — dedi ol.
Qoǵamdyq saldary
Allan Pýýrýdyń aıtýynsha, halyqtyń qartaıýy memlekettiń zeınetaqy men densaýlyq saqtaý shyǵyndaryn arttyrady. Sonymen qatar, bul qart adamdardyń saılaýdaǵy saıası salmaǵyn kúsheıtedi. Onyń pikirinshe, sonyń nátıjesinde qoǵamnyń uzaq merzimdi nazaryn jastarǵa qatysty taqyryptardan (bilim berý, otbasylyq saıasat) qarttardyń qajettilikterine qaraı burýǵa ákeledi.
Aıta ketelik Túrkııadaǵy qarttar sany 96 eldiń halqynan kóp.