Estonııa qoǵamdyq kólikte tegin júretin alǵashqy el bolmaq
TALLINN. QazAqparat - 1 shildeden bastap Estonııada búkil el aýmaǵynda qoǵamdyq kólikte táýlik boıy tegin júrý tártibi engizilmek, dep habarlaıdy Euronews.
Álemde eshbir el áli mundaı batyl qadamǵa barǵan emes. Estonııa buǵan deıin, 2013 jyly el astanasy Tallınde avtobýstarda, poıyzdarda jáne tramvaılarda aqyly tarıfterdi alyp tastaǵan bolatyn. Sodan keıin qala turǵyndaryna «qalalyq» retinde tirkelip, 2 eýroǵa qoǵamdyq kólikte tegin júrý múmkindigin beretin «jasyl karta» satyp alý usynyldy. Al basqa óńirlerdiń turǵyndary men týrıster burynǵysha aqy tólep júretin.
Estonııa ekonomıka jáne ınfraqurylym mınıstri Kadrı Sımsonnyń aıtýynsha, búkil elde tegin júrý tártibi boıynsha usynystar qabyldanatyn aralyq kezeń engiziledi.
Degenmen Estonııanyń keı óńirleri bul tártipten bas tartýǵa nıetti. Óıtkeni olar qoǵamdyq kólikke ulttyq bıýdjetten bólinetin qosymsha qarjydan aıyrylyp qalýdy qalamaı otyr.
