Estonııa eýroǵa aýysty

Ol birtutas eýropalyq valıýtaǵa aýysqan 17 el atanyp otyr, dep habarlady Eýrokomıssııanyń baspasóz qyzmetinen.

Eston krony men eýronyń aınalymda qatar júrý kezeńi juma, 14 qańtarda aıaqtaldy. Eýro ótken senbiden bastap Estonııadaǵy jalǵyz zańdy tólem quralyna aınalyp otyr. Eýropalyq sheneýnikterdiń habarlaýynsha, eýro valıýtasyna aýysý úderisi sátti ótti, qandaı da bir problemalar týyndaǵan joq. Bankter, poshta bólimderi men bólshek saýda núkteleri eki valıýtanyń qatar júrýimen jáne eýroǵa aýysýymen baılanysty týyndaǵan qosymsha problemalardy qınalmaı eńserip shyqty.

«Jańa aqshaǵa aýysý protsesi Eýrokomıssııa men eýropalyq ortalyq bankmen tyǵyz yntymaqtastyqta júrgizildi», dep habarlady ekonomıka máseleleri jáne valıýta saıasaty jónindegi eýrokomıssar Ollı Ren.

Sarapshylardyń aıtýynsha, eston kronynyń aınalymdaǵy merzimi resmı aıaqtalǵanyna qaramastan, eski aqshanyń 13 paıyzy áli de estondyqtardyń qaltalarynda qalyp otyr. Halyq ol aqshalaryn aǵymdaǵy jyldyń maýsym aıynyń sońyna deıin kez kelgen bankte resmı aıyrbas baǵamy boıynsha jáne qosymsha qyzmet aqysynsyz eýroǵa aýystyra alady. Odan keıin birdi-ekili bankter ǵana valıýtany taǵy 6 aı boıy aýystyryp bere alady. Al 2012 jyldan bastap krondy eýroǵa aýystyrý múmkindigi tek eston ortalyq bankinde ǵana saqtalady.