Estonııa basshysy prezıdent saılaýyn 3 qazan kúni ótkizýdi usyndy
ASTANA. QazAqparat - Estonııa prezıdenti Toomas Hendrık Ilves el parlamentine memleket basshysynyń saılaýyn 3-shi qazan kúni ótkizý týraly jedel májiliske jınalýdy usyndy.
Saılaýshylar alqasy senbi kúni Estonııa prezıdentin daýys berýdiń birinshi jáne ekinshi kezeńderinde saılaı almady. Óıtkeni, kandıdattardyń biri jeńiske jetý úshin qajetti daýysty jınaı alǵan joq. Endi 14 kúnniń ishinde parlamenttiń kezekten tys májilisi shaqyrylýy kerek. Sóıtip, saılaý úderisi qaıta bastalady.
Prezıdenttiń sózinshe, parlament ókilderine 3-qazan kúni jańa memleket basshysyn saılaý úshin shuǵyl jıynǵa kelýi kerek. «Men saılaýǵa qatysqan kandıdattardyń barlyǵyna alǵysymdy bildiremin. Ókinishke oraı, olardyń eshqaısysy saılaý alqasyn qosa alǵanda qalyń kópshilik tarapynan qajetti qoldaý taba almady. Osylaısha, jaǵdaı endi jańa kandıttardy qajet etip otyr. Men osy joly parlament Estonııanyń kezekti basshysyn tańdaıdy degen úmittemin»,-dedi dep keltiredi Ilvestiń sózin prezıdent keńsesiniń ókilderi.
Ilvestiń ókilettiligi 2016 jyldyń qarashasynda aıaqtalady. Ol prezıdent laýazymyna eki ret saılandy. Konstıtýtsııa talaptary boıynsha ol úshinshi ret saılana almaıdy.
