Estonııa Baltyq elderiniń arasynda alǵash bolyp bir jynysty nekeni zańdastyrdy
ASTANA. QazAqparat - Estonııa Baltyq elderi jáne postkeńestik elder arasynda alǵash bolyp bir jynysty nekeni zańdastyrdy. Jańa zańnama 2024 jyldyń 1 qańtarynda kúshine enedi, dep habarlaıdy QazAqparat VVS agenttigine silteme jasap.
Sheshim biraýyzdan qabyldanbady: birjynysty nekeni Rııgıkogý (Estonııa parlamenti) 55 depýtaty qoldasa, 34-i qarsy daýys berdi. Qarsy shyqqandardyń basym bóligi oń partııa ókilderi, olar jańa zańnama dástúrli otbasy qundylyǵyna nuqsan keltiretinin aıtty. Bir depýtat daýys berýden qalys qalsa, 11 adam qatysqan joq.
«Men elimdi maqtan tutamyn, biz ár adamnyń quqyǵy qurmetteletin jáne adamdar erkin jaqsy kóre alatyn qoǵam quryp jatyrmyz», - dep málimdedi Estonııa premer-mınıstri Kaıa Kallas.
Jańa zańnama bılikke lıberaldyq koalıtsııalyq úkimet kelgennen keıin eki aı ótken soń qabyldandy. Kallas bir jynysty nekege ruqsat berý qajettiligi týraly kelissózderdi naýryzda bastaǵan edi.
Osy jyly Adam quqyǵy jónindegi ortalyq júrgizgen saýalnamaǵa sáıkes, túrli jynysty jáne bir jynysty nekeniń teńdigin qoldap 1,3 mln turǵynnyń 53%-y daýys berdi. 2012 jyly bir jynysty nekeni tek 34% qoldaǵan bolatyn.
