Eston sportshysy Bozjyradaǵy shatqaldardyń arasyn aspaly arqan boıymen júrip ótti
Sportshy eki júz metr bıiktikte jarty shaqyrym qashyqtyqty júrip ótti. Túsirilim 50 gradýs ystyqta jáne qatty jel soǵyp turǵan kúni ótti.
«Bozjyra men úshin úlken synaq boldy. Ol meniń ómirimdegi eń kúrdeli, ári ádemi jobalardyń biri. Bozjyranyń sýretterin kórgende qaıran qalyp edim. Al, osynda kelip, sol sulýlyqtyń bárin óz kózimmen kórgen kezde, tipti tańǵaldym. Burynǵy muhıttyń orny degen derek qııalyma qanat bitirdi. Qazaqstanǵa alǵash ret kelýim. Maǵan bul jerdiń halqy qatty unady: shetinen meıirimdi, aqyldy, óz isin jaqsy biletin adamdar eken», - deıdi ıAan.
Túsirilim bes kúnge sozyldy. Maqsaty — Bozjyranyń týrıstik múmkindigin jańa qyrynan pash etetin erekshe beınerolık túsirý.
Eń basty mindetterdiń biri - shatqaldyń tabıǵatyna asqan uqyptylyqpen qarap, osy tarıhı mekenge qatysty qoıylatyn ekologııalyq talaptardyń bárin tolyǵymen oryndaý.
«Búginde Mańǵystaý oblysy Qazaqstan týrızmindegi basym turǵan baǵyttardyń biri. Bıylǵy kelgen sheteldik saıahatshylardyń sany boıynsha, bul óńir alǵashqy ozyq bestiktiń qataryna kirdi. Mańǵystaýdyń álemdik fılm-týrızminiń ortalyǵyna aınalý múmkindigi bar. Biz óz ólkemizdiń aıryqsha sulýlyǵyn ashyp kórsete alatyn bastamalardy qoldaýǵa daıynbyz. Tek keletin adamdar tabıǵatymyzǵa asqan uqyptylyqpen, janashyrlyqpen qaraýy kerek», - deıdi «Kazakh Tourism» UK AQ basqarma tóraǵasy Talǵat Amanbaev.
Ejelde Uly Jibek joly Mańǵystaýdyń jerin basyp ótken. Al Bozjyra aýmaǵyndaǵy bekiniske uqsaıtyn shatqaldardyń biri Qazaqstan Respýblıkasynyń myń teńgelik banknotynda beınelengen.
«Sondaı keremet jer eken. Mundaǵy biregeı lokatsııany óz kózimmen kórgenime, oǵan qosa, adamnyń fızıkalyq múmkindigi men tabıǵattyń sulýlyǵyn ushtastyra alǵanyma qýanamyn», - dedi sportshy.
ıAan sleklaınmen 12 jyldan beri aınalysady. Búginde ony júıkesi myqty atlet dep ataıdy. Óıtkeni bos tartylǵan aspaly jolmen júrgen kezde, sportshy tepe-teńdikti denesi men qolyn qımyldatý arqyly ǵana saqtaıdy. Al jeldiń ekpini aspa joldy aıaqtyń astynan ońaı julyp ákete alady. Sonyń kesirinen adam tepe-teńdigin saqtaı almaı qalýy múmkin.
Bul sportshy álemniń úsh dúrkin chempıony, álemdik deńgeıdegi talaı rekordtyń ıesi, eń aıryqsha lokatsııalardy baǵyndyrǵan adam. Ol birneshe ret gollıvýdtyq fılmderde kaskader bolyp jumys istegen jáne Madonnanyń kontserttik týryna qatysty. Sol týrdyń aıasynda sleklaıner-nómirler kórsetip, ánshige aspa jolmen júrýdi úıretken.
Aıta keteıik, bul joba Mańǵystaý oblystyq ákimdiginiń, QR Mádenıet jáne sport mınıstrligi jáne «Qazaq Týrızm» UK AQ-nyń qoldaýymen iske asty.
